久違了的八號(有上過九號)風球，仲要過咗七點之後都仲係八號，今日反而比平時早咗準備無上半場嘅工作。
依家9點7分，按港交所(00388)《颱風、極端情況及黑色暴雨期間的安排》：「8號或以上信號或極端情況若在早上9時後至11時期間解除，開市前時段及早上交易時段會被取消」換言之今日大家可以抖一個上晝。
咁下半場個市會點？港交所話：「如果信號或極端情況在中午12時後解除，港股全日停止交易。」
雖然係咁，但今日其實係港交所大日子，就係公布今年中期業績，過去就算出八號或者黑雨都唔見得業績會唔出，估都係嘅，咁大份業績都唔會今朝起身先嚟做啦。
記得噚日有講過今朝係講港交所(所以先打稿咋)。市場預期港交所今年上半年純利介乎49.13億元至52.01億元，按年跌0.08%至5.6%。
除咗有報導指螞蟻集團最快於8月內向香港聯交所遞交上市申請，仲有報導引述消息指農夫山泉將於下週一(8月24日)招股，暫定9月4號上市，集資額10億美元。不過，呢啲來港上市、中概股第二上市等嘅概念，都不知炒咗幾多萬次；但仲人有願意因為呢啲原因而去炒先至係重點。
望望港交所個日線圖，五條主要平均線順序排列，而SlowSTC(14,3)則處中軸水平，但見%K線明顯抽升穿%D線；不過10天線($375.92)似乎作勢想下行跌穿條20天線($372.33)。
開埋保歷加通道出嚟睇，保歷加通道口此前收窄完之後，依家現窄位橫行的情況，猶幸目前仍處保歷加上升通道裡面。
港交牛(55397)，收回價$355.18，同噚日收市價$379計有6.28%差距，槓桿比率逾16倍，換股比率100，睇咗佢份業績而下晝開到市嘅話先再搵位入啦。(應該開到，求其兩個鐘港交所死都要開架啦，唔駛搵錢咩)
BTW，如果下半場真係無市嘅話，【輪證下半part】亦會休息一天。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
