美國聯儲局議息會議維持利率不變，鮑爺更發表鴿派言論，重申維持低息直至有信心經濟重回正軌，亦承諾動用所有政策工具支持經濟，亦未有打算恢復加息，如有需要，可以調整前瞻指引及資產購買。呢一番言論令華爾街放下心頭大石，美股回升，標指跟納指更升逾1%。而港股今日跟隨美股做好，恒指成功收復10日線。
恒指高開96點，開市後一度升170點，重越二萬五關及10日線(約25021)，但喺早段欠缺成交支持下，升幅縮水至29點，見24912點半日低位，其後再次回勇，半日最多升314點，見25197點半日高位。並創一星期高位。中午恒指報收25143點，升260點；國指則升50點，報10235點。
恒生科技指數跑贏大市，中午收報7229點，升144點。幾隻權重股全部有進帳，騰訊(00700)半日升近1%，但受制550阻力；阿里巴巴(09988)重上10及20日平均線，有望再展升浪，半日升2.2%。美團(03690)及小米(01810)分別升2.4%及1.8%；舜宇(02382)亦錄得1.8%升幅。
藍籌股個別發展，大笨象(00005)反彈1.8%，睇款都係死貓彈，呢啲位又畀幾條移動平均線擋住，要重上37元有難度。港交所(00388)改勢未改，半日升1.7%，逼近前高位。本地地產股反彈，新世(00017)半日升5.3%，係表現最佳藍籌，其他本地地主佬至少彈2%，不過呢個板塊點反彈都好，都唔會吸引到阿Man上車。
醫藥股抖咗一陣又嚟料，一對藍籌石藥(01093)及中生製藥(01177)分別升5%及2.5%。康希諾生物(06185) 科創板發行定價209.71元人民幣，H股半日升近一成，之前阿Man講過此股聽聞後面有軍方背景，股價喺呢半年升幾倍，5月見285.8元高位曾急回，但經過兩個月又重返250元水平之上，如此強勢，即使背後唔係有軍方背景，都肯定係實力雄厚嘅大孖沙。
關注祖龍娛樂
呢期資金都較熱衷炒半新股，阿Man上周叫要定定嘅思摩爾(06969)一被納入「港股通」，即日日見北水流入，今日亦唔例外。除咗思摩爾之外，阿Man亦關注祖龍娛樂(09990)，呢隻遊戲股通常畀人印象係騰訊概念，因為騰訊透過子公司持有其13.34%股份，不過睇番公司背景，本來係內地首五名遊戲開拓商之一嘅完美世界旗下子公司，而祖龍泊到騰訊呢個大碼頭，有條件獨當一面，拆開嚟港股上市。而招股時更吸引新加坡政府主權基金GIC入場，持股6.83%，以及由公司管理層組成嘅公司Green Particle持有6.17%股份，加埋大股東35.35%，同埋完美世界所持17.6%股份，呢幾個主要股東已持股近八成。
祖龍今年內同將會推出幾個新遊戲，其中一款SLG遊戲跟騰訊共同開發名為鴻圖之下，係騰訊今年寄予厚望嘅新game，希望透過呢款新game，可以對抗網易(09999)手上熱爆game《率土之濱》。相信祖龍跟騰訊合作嘅可於年底前登場嘅幾款遊戲，將會令公司明年收入有突破性增長。
麥狄文
(徐狄怡‧證監會持牌人)
