美股上周五假期,但就業數據表現好過預期,而ISM製造業PMI更重返擴張水平52.6%,即使疫情喺經濟活動重啟後有反彈,但聯儲局大力放水下,經濟開始復甦,投資者信心亦完全回復,股市先行一步,納指更創新高。港股經過五不窮,六不絕之後,7月唔係叫翻身,係更上一層樓,踏入7月成交急增,過去三個交易日累升逾千點,今日半場再升近900點,呢千幾二千點幾個交易日搞掂。
恒指今早高開172點,見一見25543點半日低位後持續向上,加上A股急升,阿爺放水令中港兩地股市愈升愈有,A股升4%,恒指最多升925點,高見26298點,創四個月高位,恒指更重上250日線(26102點)。恒指中午報收26248點,升875點;國指則升394點,半日報收10637點。半日成交額已達1259.63億元,成交配合升勢,淡友根本無得唔投降。
上星期阿Man都預咗大市要上二萬六,只係今日即達標就有少少意外,恒指已成功回補3月下跌裂口,即使嚟緊幾日有機會回調整固,只要指數守住25500至25800點,大市將會繼續一浪高於一浪向上推進。之前阿Man經常強調,大市一日唔重上二萬七點,都只係視為反彈,但疫情發生後,全球央行齊放水,低息環境持續兼資金泛濫下,資產格價好難回落,尤其債券回報係低息環境下未如理想,資金自然湧入股票市場。
由疫情全球爆發至環球央行急急放水,環球股票市場僅僅係第一季向下,踏入第二季已回升,4月至6月即使喺疫情下,所謂嘅疫情受惠股,新經濟股更炒到出煙,即使大市停滯不前,好多網股及醫療股已創晒新高,之前阿Man都預咗,大市升越25000之後,要更上一層樓,必要靠班指數老鬼發力。
呢兩日卒之見傳統股起動,內銀、內險股低位大力反彈,國壽(02628)彈力特別強勁,今日再升一成,不過接近20元有阻力,無貨唔應該呢啲位再追,有貨更要睇住食糊。內銀股普遍升4%以上,建行(00939)逼近年初高位,工行(01398)相對落後,到依家都仲未補返1月底個巨型下跌裂口。對於內地金融股,阿Man上周都只係睇好內地券商股,結果亦係呢個板塊升勢最凌厲,今日大部份券商股升幅超過一成,招商證券(06099)跟光大證券(06178)更升逾兩成。不過阿Man心水仍然係投行業務佔比較重嘅中信証券(06030)同埋中金(03908),中金有機會破頂,前高位19.8;中信就升至20元阻力,要企得穩20元,先有機會再向上挑戰25元。
科技股個別發展,唔少股份升至高位創新高後回調,要數最厲害嘅科技股,呢期唔使問一定係中芯(00981),半日再升13.4%創新高,當年招股時買入坐艇多年嘅長期股東,今年終於守得雲開見月明。
麥狄文
(徐狄怡‧證監會持牌人)