熱門:

2020年1月9日 即巿股評 港股直擊

【盤房來料】美股玩家愛死侵侵

本來如箭在弦嘅波斯灣局勢,令噚日亞太區股市震盪,以為道指期貨跌到仆直,夜晚美股肯定死,誰知侵侵出嚟講幾句,美股又倒升,納指仲要創埋新高,你話華爾街班大孖沙,點會唔愛死侵侵。恒指亦跟隨美股反彈,隔晚夜期同ADR已先拔頭籌,今日港股承接外圍升勢反彈。

恒指高開279點,成功收復10日線(28262點),其後升幅收窄至237點,見半日低位28325點,其後再升351點,見半日高位28439點,暫時28500點有啲阻力,即管睇睇下半場有冇本事衝埋上去。半日恒指報收28385點,升297點;國指則升133點,報收11213點。

噚日阿Man好有信心咁叫大家趁回吐要撈大隻佬,今日騰訊(00700)同友邦(01299)半日分別升1.7%及0.9%,騰訊似乎無懼高層減持,企得穩380元,升勢可以持續。中資金融股做好,建行(00939)跟工行(01398)半日升逾1%。
由於中東局勢未見惡化,而石油庫存量又意外地上升,油價急挫逾4%,三桶油回吐。話咗油股難炒到嘔,油價其實能否高企係一回事,皆因油價高企係會帶嚟通脹威脅,估計呢樣嘢大家都唔想見倒,所以油價升勢有所限制。跟石油股一樣,今日金礦股亦見回吐,不過一旦今年出現通脹,金價仍然睇高一線,雖然今日金礦股全線回吐,但只要金價企定穩喺1550樓上,金價走勢都係一浪高於一浪。

阿Man一直推介內需股,今日輪到體品股發力,細摩唱好李寧(02331),表示係行業首選,刺激其股價半日升逾9%,安踏(02020)亦唔輸蝕,半日升6.8%,其他體品股普遍錄得1%以上升幅。除咗體品股,乳業股亦落鑊,雖然蒙牛(02319)升幅唔夠其他細隻啲嘅乳品股咁勁,但行業龍頭始終最穩陣。其他食品股及啤酒股同樣見資金流入,新年係傳統消費旺季,內需股呢段時間料可繼續做好。

阿里健康(00241)早兩日升得唔錯,但無啦啦有股東以每股9.42元減持,今日逆市回吐,半日跌近2%,不過阿里健康中線仍可以睇好,只要股價能靠穩喺9.5元樓上,整固幾日可能又升過,家陣先喺10元水平之前抖抖。

講到尾港股市底都算係咁,既然噚日落到27800水平企得住,即係27800呢個喺去年11及12月嘅雙頂阻力,已變成支持位。噚日叫大家喺二萬八邊撈貨,就係因為下面27600水平正正係250日線,支持力度頗強,睇住呢個位上車,三兩百點嘅止蝕,上面睇番29000點,點計都有一定值博率。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads