熱門:

2019年12月16日 即巿股評 港股直擊

【盤房來料】港股市底轉強 守牛熊線可挑戰二萬八

中美貿易談判最快可以喺下個月達成首階段協議,可能係上星期呢個消息已炒足幾日,美股喺上周五晚反高潮,升幅最終收窄,而港股喺夜期及ADR亦見回落。而今早港股亦出現回吐,但目前沽壓唔算嚴重。恒指低開157點,早段最多跌214點,見過半日低位27473點,仍然守住250日線27472點。不過中國公布11月份工業增加值及零售增速均勝於市場預期,大市即拗腰回升,一度倒升28點,見過半日高位27715點。恒指中午報收27585點,升102點;國指則報收10824點,跌13點。

藍籌重磅股個別發展,大笨象(00005)跟友邦(01299),前者睇吓支持位60元喺今日收市前企唔企得番上去,後者支持位喺80元,兩股今日有啲回吐,如能守住支持位,兩股後市仲有得上。不過另一巨無霸騰訊(00700)半日無升跌,升得上360元又企得穩,後市仍可睇好,留意355元為短線支持,要進一步向上挑戰380元,希望360元可以站得住腳。

而阿Man晨早喺《金融街密語》講咗醒目投資者要跟住智慧超人走,既然長實(01113)喺英國落重注,亦係英鎊可低吸嘅時候,並非事後孔明,米字旗國保守黨大選勝出,英鎊回升,長和系亦得到投資者垂青。長建(01038)及電能(00006)今日上半場分別再升3%及2.4%;長和(00001)亦升0.7%,只有長實跟隨其他陀地地產股回吐。

中美貿易談判發展似乎幾踏實,人民幣總算守住七算,加上中國首11月商品房銷售額增加7.3%,內房股逆市做好,融創(01918)挑戰前高位,半日再升2.4%,睇嚟破頂在望。而其他內房股升幅由0.8%至3.6%不等。

熱錢並未有離場手機設備股,市場憧憬5G新手機陸續出台,今日最熱炒嘅係機殼股,不過機殼股屬於呢個板塊內較低端技術股份,小心呢個板塊已炒到尾水。其實手設股都係揀番啲大件頭嘅龍頭股穩陣,一對蘋概孖寶仍然係首選。而同樣係做鏡頭嘅丘鈦(01478)盈喜之後愈升愈有,同樣係優先考慮。

濠賭股升勢有餘未盡,市場憧憬呢個星期稍後時間習大大到訪澳門,出席澳門回歸廿年慶祝活動,會有好消息公布,澳門股普遍上揚,而今日升得最勁係信德(00242),今日都算追落後。留意阿Man較為睇好嘅銀娛(00027)開始逼近60元目標價,現價再追值博率大減,話唔定等破位追貨更大勝算。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads