熱門:

2019年12月10日 即巿股評 港股直擊

【盤房來料】累積升幅大強勢股要計數離場

隔晚美股回吐,市場似乎喺呢個超級事件周都抱較審慎態度,雖然侵侵仍對中美貿易談判有信心,不過美股之前升咗咁多,回吐亦好正常。美股三大指數回吐幅度唔算大,沽壓唔嚴重,雖然今日港股低開,但後來都漸漸收復部份失地。

恒指低開115點,最多跌139點,見過半日低位26355點,其後回穩並倒升32點, 見半日高位26527點,中午恒指報收26471點,跌23點;國指則跌5點,報收10402點。半日成交維持淡靜,預計喺本周日美國對華商品加徵關稅限期前,市場都會傾向保守,先觀望貿易談判進展。暫時恒指喺26500點水平爭持。

嚟到年尾又係計數嘅時候,今日內需股喺無乜消息嘅情況下,明顯下跌,睇嚟都係食糊盤計數離場,當中兩隻體品股龍頭,跌幅較為顯著,李寧(02331)半日跌逾5%,安踏(02020)亦跌逾3%。而之前一直強勢嘅美團(03690)半日跌2.2%,今日錄得北水淨流出。

其他重磅股都係咁上下,個別發展,乏善可陳,唯一係大笨象(00005)公布人事變動後,股價反而今日靠穩,即使家下唔再有聖誕鐘,炒匯豐呢枝歌仔唱,但大笨象喺現水平都算企得幾穩,若大市整體向上,大笨象或有機會重上59至60元。

之前強勢嘅內需跟醫藥股,近日都有轉弱跡象,醫藥股當然係受帶量採購,藥品降價幅度較預期大而走弱,而內需股就因為計數食糊,流出嘅資金近日似流向之前一直落後嘅晶片股及軟件股身上。晶片股已經炒咗幾日,軟件股則剛起步,呢兩個板塊勢頭仍向上,推介金山軟件(03888)破位而上,料升勢可持續。另一似起步嘅金蝶國際(00268)亦似起動,不過能先突破8.2元走勢更佳。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads