噚日揀咗隻恒指牛(63227)出嚟,喺恒指5分鐘圖上見到由下晝2點5分至3點,SlowSTC(14,3)落到嚴重超賣水平,呢段時間(63227)高低位做過$0.058/$0.053,平均買入價就係$0.0555,既然預咗持貨過夜,注碼上就要小心控制。
今朝起身睇新聞,見到噚晚美股三條指數都係下行,而日經亦跌過百點,心諗隻(63227)都可能凍過水;但係擔心都無用,市都未開乜都無得做。如常落街等巴士返工,但今日唔知做乜遲咗成20分鐘先有一班車,仲要企;不過企位隔離有個男士抱住一個仲未識講嘢嘅BB,坐咗喺呢位男士(應該係爸爸啦)嘅大脾,BB嗰兩碌米芝蓮大脾同節瓜手,唔知點解見到都覺得心情愉快。到做完U盤之後,恒指開報跌100點,做26806點;但到正式開市之後,恒指逐步收回失地,至依家10點18分,恒指倒升43點,做緊26950,5分鐘圖上SlowSTC(14,3)上到超買水平,可以準備收割。
睇返恒指日線圖,其實目前恒指仲未擺脫10天線(26776點)同100天線(27003點)呢個位窄位;就算轉用保歷加通道嘅話,現水平處於保歷加上升通道嘅中間位置,亦搵唔到啲乜出嚟。而阻力位嚟講,仍然都係「27000點+100天線+『中長期下降軌』+0.618」。
轉睇恒指牛熊證街貨圖,上方熊證最貼價為27000至27099點,呢度有相當於591張期指,而重貨區位置無變,仍然都係27100至27199點,但貨量就多咗,至1141張期指。下方牛證就有一層新增街貨層,就係26700至26799點,貨量唔多,就只有68張期指啫;再向下望落去,都真係唔見有重貨位,講緊要數番落去25200至26299點,但講緊只有相當於629張期指,咁可想而知有幾多近牛啦。
依家10點29分,恒指現價做緊27006點,升100點;5分鐘圖上見SlowSTC(14,3)喺頭見10點5分至今都處於嚴重超買水平,(63227)呢段時間高低位做過$0.069/$0.06,平均賣出買就係$0.0645,對比平均買入價,即平均賺幅為16.2%,已經報埋上次博牛證闖27000點個仇之餘,仲有多餐茶錢過weekend。
忽然收到通知下晝有會要開,所以今日【輪證下半Part】要暫一日,反正都食咗餬,都係Happy Friday啦!
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:gladyshan@gmail.com;FB:輪證贏家