熱門:

2019年9月19日 即巿股評 港股直擊

【輪證贏家】仲有重牛街貨架

噚日下半場悶足全場咁滯,隻恒指熊(55636)揸住過夜,今朝早起身都仲被美股嚇一嚇,事關美聯儲減息0.25厘,而道指一度跌逾200點,但收市就倒升幾廿點,都話咗減唔減息都唔係重點,重點係個市如何去解讀呢單嘢啫。

喺巴士上見到恒指做完U盤,恒指升66點,開市報26820點;踩入公司門口大約9點40分到,事關一行到返自己個位時就見到個電視已經開著,望住右下角恒指報價見紅,但其實我心諗:我噚晚無熄電視?見到同事Thomas同Patrick比我更早返咗嚟,我唯有同自己講係佢哋兩個想睇電視而開架啦(其實真係唔會...)

依家9點48分,斟完杯水喺位度打緊隻稿,見恒指由我返嚟時跌4X點,進一步下跌至跌8X點,開緊恒指5分鐘圖之際,我舅父Eric忽然send張3X年前嘅相過嚟,哈,嗰張相就係未讀書但曉行曉走嘅我,好彩嚇大啫,唔係都被自己嚇親;再將張相forward比我家老爺認人,佢答我呢個係我最好嘅嗰位中學同學阿賢、第二次估係我表妹阿婷、第三次再估竟然估係我同事...哼!連戰友Jack都估到係我啦,等我今晚同我兩個老友雞煲完返屋企之後你就知死!

笑過一輪之後再望望電視機,搞咩已經跌過百點, reload多次個圖再睇已經跌逾200點,一望就望到條SlowSTC(14,3)落到個位數嘅超賣水平,呢估時間(10點7分)將隻(55636)掉走,證價做緊$0.085,對比噚日計過嘅平均買入價$0.0685,24.1%賺幅已經袋袋平安。

再睇返恒指日線圖,重整一下依家發生咩事先。恒指今朝高開低收走,由升轉跌,呢三日粒燭都係貼住條50天線以下運行,但今日無啦啦條10天線(26884點)升穿咗條50天線(26890點),發出咗個「黃金交叉」訊號,咁都無乜嘢嘅,港股由8月15日低位24899點一直向上行至依家26580點(10點11分mark低計)計,好歹都叫做彈咗1681點先啦,唔出返個交叉點對得住個市先得架。不過SlowSTC(14,3)個頭就愈耷愈低;Click埋條保歷加通道出嚟睇,保歷加通道頂有下行之嫌,即暗示收窄咗大市上行嘅高度。

開埋恒指牛熊證街貨圖,截至10點14分止以恒指最低見過26540點計,下方第一層牛證26600至26699點全數死亡,呢度有相當於1030張期指。而26500至26599點呢度就有成819張期指嘅街貨,而當中有一半死咗,之前有介紹過坊間有輪商網站有出到以50點為一層街貨嘅牛熊證街貨圖,比大家再拆細啲去睇嘅,喺26550至26599點呢度有相當於123張期指,不過都已經死晒,變相依家最貼價其實係26500至26549點,呢度有相當於696張期指,換言之喺呢819張期指街貨裡頭,大市依家先食得嗰15%,餘下嘅85%又點會放過佢哋呢?

至於上方熊證,最貼價嘅係26900至26999點,呢度有相當於343張期指,如果現價(10點24分mark)26601點反彈299點嘅話,咁現價先至叫做行到去門口位;但如果用同樣點數向下殺嘅話,即係殺落去26302點,換言之即連殺三層(嗰2點豪埋比你),都有過千張期指架。

明白見個下今朝早一下子向下衝嘅時候,相當有26500至26599點嘅牛證會出現大逃亡,但估計可能有牛證後將防守線向下移。Day Trade嘅話,恒指熊(55811),收回價26900點係市場最貼價嘅熊證,同另一隻同一收回價相比嚟講,(55811)槓桿係爭啲(但都有約56倍槓桿架),不過另一隻嘅街貨有成23.7%,(55811)都只係1.7%。

安全啲可考慮恒指熊(55832),收回價27200點,同現價有逾500點差距,槓桿比率約35.9倍,係同一收回價中槓桿最高。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads