噚日個市悶到嘔,喺[下半Part]show咗個5分鐘圖出嚟,嗰走勢被讀者喺FB page留言話「幅圖仲平過機場條跑道」,哈哈,真係好貼切,悶市中忽然有啲樂趣,咪就係呢啲囉。而講咗兩日嘅恒指牛(53378),之前都有講過話以無打為上,所以仲未走到嘅,噚日下晝3點15分至35分呢段期間,SlowSTC(14,3)上到8X時,就將隻(53378)放走,按(53378)當時高低位做過$0.07/$0.066,平均賣出價#0.068,其實同前兩日Day trade嘅平均值一樣,但都係嗰句,見個市吽咗咁多日擺到明係儲緊街貨,喺未確實個市想打邊一邊時,啲貨走得到嘅就走,一陣間出現「無差別」襲擊時,真係報警都無用。
依家10點1分,恒指今早高開2點,報26272點;不過,開市無耐就向下行,暫時最低見過26057點,最多跌過213點,如果個市當時向下再跌多58點嘅話,咁就落到去下方最貼價牛證25900至25999點嘅門口,呢度有相當於718張期指,亦係牛證重貨區。
至於上方熊證仍然都係26300至26399點,呢一層有相當於328張期指,雖然「冧心」細,但當中有187張係噚日新增;而重貨區就係26500至26599點,呢度有相當於716張期指,都係未過千。
其實日線圖睇都唔見恒指有好大變化,仍然都係喺26200至26000點呢個範圍內,四粒燭排排坐咁。要係咁窄嘅位做trade,就真係要搵啲高槓桿、敏感度高嘅輪證落場先得,否則即使睇啱方向,但喺槓桿唔夠嘅情況之下,都好難有肉食。
依家10點24分,恒指跌幅稍為收窄咗,如果按26200至26000點呢200點窄幅炒上落嘅話,你真係要好有心機同時間先可以做到;但如果你無其中一樣嘅話,咁今日都係齋睇好過。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家