熱門:

2019年4月18日 即巿股評 港股直擊

【盤房來料】一動不如一靜

長假期前例靜,今日亦唔例外,半日成交縮水到500億左右,全日成交額未必過千億。冇水入場市況自然作軟,恒指今早低開36點後,雖然曾守住30000點更見過半日高位30101,僅跌22點。可惜缺乏資金入場,中午前大市再度回軟,最多跌196點,低見29927點,失守10日線(30004點)。恒指中午報收29942點,跌181點;國指報收11753點,跌95點。

火車頭騰訊(00700)中午報收391元,跌1.1%,連同四大內銀股回吐0.8%至1.7%,合力拖低大市。資金繼續喺唔同板塊之間流動,噚日威威嘅汽車股,可能噚日升勢有啲急,今日出現回吐,吉利汽車(00175)跟比亞迪(01211)噚日升得勁,今日自然回得多啲,分別跌4.5%及4.2%,係表現最差嘅藍籌及國指成分股,其他汽車股普遍回吐超過2%。

今日資金流入手機設備股,噚日阿Man喺社交平台建議要買比亞迪電子(00285),指其估值低廉較抵買,今早其股價一度高見14.4元升幅接近一成,半日升幅收窄至5..2%,即係話高位都有食糊盤出嚟,乜股都係高追無乜着數。不過比亞迪股價上得到14元企穩的話,下一站目標16元。其他手設股同樣做好,舜宇(02382)跟瑞聲分別升3%及2%,係表現最高嘅兩隻藍籌股。

資金亦追住國策股嚟炒,由於發改委內部徵求意見,準備計劃提供家電及手機補貼家電及手機補貼,手機設備股落鑊,家電股當然都有份,海信家電(00921)半日升2.9%,創維數碼(00751)升2.6%。TCL(01070)及海爾電器(01169)分別升2.3%及1.1%。由於家電話今日升勢唔算太急,相對回吐壓力冇咁大,話唔定仲有一浸升。
而中國鐵塔(00788)公布業績首季約利勁升超過兩倍,股價一度升逾6%,創2.24元新高;中午報收2.21元升5.2%。其他5G概念股亦有資金追捧,升幅普遍2%或以上。反正長假期在即,今日一動不如一靜,留待假期後再戰。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads