|
熱門:

2019年3月15日 即巿股評 港股直擊

【輪證贏家】平保牛收割

噚日講咗隻平保(02318),日線圖見有「身懷六甲」VS「終極黃金交叉」,但基於「終極黃金交叉」嘅威力大過「身懷六甲」,於是吼朝早11點40至11點45分時,見平保5分鐘圖SlowSTC(14,3)落到一個相對低且超賣水平(未到嚴重超賣),就將隻平安牛(57092)落場,當時(57092)高低位做過0.062/$0.061,平均買入價就係$0.0615。至噚日[下半part]時,望望恒指粒數同朝早差唔多,平保股價亦未有重大突破,數數手指三個鐘唔夠就有8.9%嘅賺幅,大注嘅就可能收割咗。

今朝返工時本來無雨,但巴士一埋站就係咁落,跑快兩步返公司,同我前面兩個70後同一個90後吹水,講返噚日周柏豪上咗公司向女同事派朱古力(我噚日下晝出咗去開會咁就miss咗),我前面嗰位90後女同事Raina好開心,仲開心到今日喺Pantry收埋周柏豪張poster;講吓講吓就扯到去那些年嘅Marlboro Red Hot Hits...都係算啦,除咗80後(仲要係初期嗰班)之前出世嘅人之外,應該都無人知係乜...我feel到已經靜過太空...

今朝恒指開市都係樣樣衰衰咁,返到嚟都仲見到跌幾點咁,到依家10點16分,恒指發力向上,有企圖/意圖想衝破29,000點呢個關口;至於隻平保時就升1.75%,做緊$86.85,(57092)就做緊$0.079,如果噚日無走到而選擇今日走嘅話,以現價計賺幅達28.46%。

依家10點29分,恒指已經創今日新高,暫高見29048點,再度挑戰29000。打比一位Sales同事講完兩句之後,再市似乎愈升愈有咁。開恒指牛熊證街貨圖,上方熊證第一層28900至28999點嗰790張期指一早死晒,依家最貼價嘅變相係29000至29099點,但以依家10點46分恒指報29080點計,呢層嗰406張期指都應該凍過水,如果今日收市時,可以收喺29000點之上的話,咁之前講過嗰三層每層有過千張期指嘅熊證街貨就真係隨時問斬啦。

留意住29000點呢個位企得穩唔穩啦;今日下晝2點半小妹有個會要開,抱歉[下半part]要停一日。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。