噚日朝揀咗兩隻恒指牛(65537)同(62206)出嚟,如果本身係企圖/意圖想借港交所(00388)業績亮麗,順便炒起恒指而作恒指牛嘅部署的話,咁就應該吼朝早恒指5分鐘SlowSTC(14,3)喺10點55分至11點落到相對低水平嘅時候送牛證落場,呢個時間(65537)同(62206)平均買入價就係$0.0425同$0.061。中場休息時港交所無令大家失望,恒指再炒上升穿29000點,炒快本能將(65537)同(62206)掉走,同以當時兩隻牛證高低位拉個平均數作為賣出價,即$0.052/$0.07,賺幅分別有22.4%同14.8%;快炒業績比起份《財政預算案》更有意思。
記得噚日2點幾時恒指無啦啦向下急插,唯一解釋只可以話A股倒跌而個市就跟住下行。若然拆開5分鐘圖就見到其實下晝2點半至2點50分呢段時間,恒指5分鐘SlowSTC(14,3)落到超賣水平,就算平時唔係炒開業績嚟講,呢個位你都可以視為一個低吸牛證嘅買入位。過一晚夜之後,今朝早見到日經下行係咪有啲擔心呢?無事嘅,依家9點56分,恒指由本來今朝早37點,到依家倒升18點,做緊28776點,恒指5分鐘SlowSTC(14,3)上爬且開始踩入超買區,過咗夜隻牛證可以準備走人。
開埋恒指牛熊證街貨圖睇,下方牛證再出多咗貼價貨,依家最新最貼價嘅係28500至28599點,呢度有相當於442張期指;至於上方熊證最貼價嘅仍然係29000至29099點,街貨比噚日見到嘅多咗相當於250張期指,有970張。貼價牛雖然愈追愈近,不過以恒指依家升勢咁順,且上方熊證始終比下方牛證多嚟講,上行真係有着數。講真,攞最近五層嘅牛熊街貨圖睇,上方熊證都有三層已經有過千張期指喺度,而下方牛證就其有一層。恒指牛(60746),收回價28300點,同現價有逾400點差距,都OK進取架,約65倍槓桿且低街貨,短炒選擇。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#
#輪證贏家# #輪證下半part# #窩輪# #牛熊證# #恒生指數#