依家9點41分，剛剛由Pantry CEO珠姐手上接過佢親手做嘅蛋糕一件(我今朝早餐有著落啦！多謝珠姐！)之後，嘩！望望電視機幾驚個25000點就咁就玩完，事關今日呢隻稿一開始我係打好咗條大題《25000點仲保得住嗎》，我唔想/懶得再改。
依家9點51分，恒指由跌過百點到依家倒升32點，做緊25162點。而噚日隻恒指熊(59064)，基本上快手嘅就喺噚日已經day trade咗一轉，皆因恒指5分鐘圖上由11點55分至下晝返嚟嘅1點10分，SlowSTC(14,3)出現超買，呢個時候(59064)高低位做過$0.128/$0.122，拉個平均數$0.125作為買入價計，跟住鏡頭一轉，喺下晝1點45分至2點10分呢段時間，見恒指5分鐘圖嘅SlowSTC(14,3)由此前買入時見嘅超買，落返去超賣水平時將(59064)day trade快閃黨嘅話，再按呢段時間高低位$0.135/$0.127計，當平均數$0.131作為賣出價，咁就執咗六格/4.8%落袋。
就算噚日朝早無入到，等到下晝先嚟入市嘅話都唔怕，只係噚日喺[下半part]講過見恒指波幅指數(VHSI)上到超買水平且有回落跡象，所以小心今日嘅波幅無噚日咁大，宜證不宜輪。再睇返恒指5分鐘圖，就見噚日下晝2點35分至45分呢段時間，SlowSTC(14,3)上到中軸水平之後就無力再上，真心想再追跌嘅，我都唔知你仲會唔會諗咁多，唔理三七二十一就已經入咗市；還是真係等再分鐘圖上見超買先再入，但無論幾時再入都好，今朝開市見恒指先跌53點，其後再進一步落過百點時就真係比晒位你走。
依家10點5分，恒指倒升幅跌進一步擴大至過百點，依家做緊25242點，開牛熊證街貨圖見下方最貼價牛證25000至25099點嗰1447張期指都應該死得八八九九(按目前最低做過嘅25013點計)，講真，爭嗰13點都唔殺埋又真係有啲難以置信，且下方第二貼價嘅24900至24999點呢度有成1263張期指，呢個位重街貨不得止，仲係噚日流入最多期指張數嘅範圍。再向下殺都唔失禮架，24800至24899點呢度都有成914張期指，當中有561張係噚日先新加入嘅。
反觀上方嘅熊證街貨，最貼價嘅都講緊25800至25899點，而呢度就只得34張期指，少都算啦，遠嗰吓先麻煩呀嘛，同現價(10點14分見恒指做緊25246點計)，要現價再向上跳多554點先至到門口，喺門口，仲未有嘢食架；「但依家恒指彈緊喎...」咁日線圖見佢今朝都進一步跌近條保歷加道通底(24940點)，觸底反彈個合理程度，同一個汽車維修員喺足球場上手揸一個士把拿，話係愛嚟上鏍絲用，都係一樣咁合情合理嘅。恒指熊(59117)，收回價26000點，同現價有近800點差距，吼分鐘圖見超買先好落場。
恒指2019年開局首日見黑，再睇埋個牛熊證街貨圖之後，有啲懷疑依家大市回升會唔會同「有太陽但唔暖」嘅天氣一樣；不過今朝睇天氣報告話聽日開始就回暖，一冷一熱確係好易病，今朝坐巴士同依家喺公司裡面，已經聽到有其他人咳(帶痰嘅，OK？！)同埋呻鼻水嘅「fee lee fei lei」(你明嘅，我真係唔識呢四個字)，所以大家要小心身體呀！我要食早餐啦，個蛋糕又實淨、又重蛋味，仲有芝士喺中間，真係好正呀！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
