熱門:

2018年12月31日 即巿股評 港股直擊

【盤房來料】方向未明繼續chok住過新年

嚟到2018年最後半個交易日,《盤房來料》提早喺上半場同大家放料,今日日本仔已放緊除夕元旦假,亞洲呢邊其實都偏向淡靜,預計港股今日半日市同樣會拍晒烏蠅。不過成交淡靜唔代表大市無波幅,上星期美股喺聖誕節假期前後交投唔算特別活躍,但波幅卻相當驚人,日日大玩過山車,上周五美股閒閒地又見400點波幅,三大指數尾市略為回軟,僅得納指仍錄得5點升幅。

港股上星期五表現亦反覆,當大家以為25000至25300呢個牛證街貨重貨區嘅牛仔準備壯烈犧牲嘅情況下,偏偏港股繼續守喺25400點水平之上,嗰一批牛仔又避過一劫。而周末期間侵侵跟習大大通過電話,侵侵其後更表示中美貿易談判有重大進展,拎住呢個理由,大戶大條道理喺今年最後一個交易日粉飾櫥窗,有冇本事重上二萬六水平做年結唔敢講,但10日線(25840點)或有機會收復。暫時恒指喺新加坡黑期重上25700水平,差嗰一百點唔係唔推,加上上周五結算後港股個款又似上唔到,引咗唔少淡倉落搭,斷估今日大戶將乘機挾淡倉。

雖然中美貿易談判侵侵又話有進展,但佢老人家出口術出得太多,缸邊友對佢講嘅嘢熱情已逐步冷卻,況且貿易戰一日未正式結束,談判期仲有兩個月,嚟緊2019年開局未必一定有煙花放,阿Man始終未敢太樂觀。呢個星期內地跟美國唔少經濟數據公布,當然會左右中美股市表現,不過唔少缸邊友仍然放假mood,內地股市今日又休市,睇嚟要過埋呢個星期,股市先有較明確方向。

內地剛公布嘅PMI指數跌穿50,反映經濟一步放緩,雖然周末期間有內地官員指市場唔應該期望阿爺會大開水喉,但家下呢個數據出咗嚟,阿爺可能侷住放一放水,手要鬆番些少。睇番2018年人行曾多次降準,累計放水已超過4萬億人仔,放水規模較十年前海嘯期間力度更大,之不過今年內嘅降準都只係定向降準,都有特定用途,並非向市場大開水喉以供炒作,自然難提振股市信心。唔排除明年人行明年放水或向股市打打氣,而MSCI進一步提高A股比重,預計A股可能今年坎坷過後,明年未必冇運行。

尤其美滙指數近日似未能再向上突破,人仔滙價轉趨穩定,為減息創造條件,一旦阿爺為刺激經濟而放水減息,A股可能喺明年有機會翻身,而港股亦可以跟轉順風車。只係黎明前夕通常特別黑暗,要有心理準備2019年上半年有機會跌穿今年10月低位,呢段時間唔好輕舉妄動,多持現金準備見低位再出擊,要阿Man估一估明年低位,斷估恒指20000至22000點有強大支持,買貨作長線投資就吼住呢個位。

既然阿Man都估要下星期股市先有方向,呢個星期一於外遊迎接新年,今日除咗早來嘅《盤房來料》,仲有信報嘅《金融街密語》,本周餘下時間所有專欄休假,下周回復正常,祝大家新年進步,明年魚缸再戰,戰無不勝。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads