雖然美股高開低走，升幅縮咗一半有突，但無礙港股升勢，港股較早前喺25500-25600點搵到支持，唔多覺嘅情況下三連升，今日半場再升逾300點，三兩日又升番成千點。恒指今早高開231點後，升幅曾收窄至128點，見過26315點半日低位，其後隨A股上升再高走，盤中一度高見26582點，升近400點。中午恒指報收26537點，升351點；國指報收10575點，升158點。半日成交額略增至426億元，但唔好祈望今日會有大成交。
外圍方面幾個利好消息帶動，孟晚舟除咗獲准保釋之外，侵侵已表示跟中國嘅貿易談判有實質進展，仲話只要對談判有正面影響，準備有需要時介入華為事件，市場憧憬美國為咗換取更大談判利益，有機會放過華為一馬，中美貿易關係可趨緩和，中港股市自然可以鬆一口氣。唔單止中美呢邊有好消息，面對逼宮危機嘅米字旗國首相文翠珊，獲超過200個保守黨員支持留任，落台危機解除，至少一年之內唔再受威脅，目前就係淨低脫歐協議投票，估計文翠珊去完歐洲各國尋求支持後，將會集中火力游說國會支持脫歐協議，始終米字旗國一旦要無協議脫歐，將對股市及經濟帶嚟負面影響。意大利方面為咗避過歐盟懲罰，已決定跪低，將2019年財案赤字由2.4%修定至2.04%，意大利債市有番啲起色，呢一個炸彈暫時拆除。
幾個負面因素漸見解除，投資市場環境亦改善，即係阿Man話咗喺年結月未必會出現大屠殺，基金經理喺年結時候，就算唔再粉飾櫥窗，亦無必要搞到粉身碎骨。預期港股今個月都係行range，暫時25500至25600搵到支持，但上面喺27300至27500點阻力仍大，能夠重上100日線(26843點)都叫唔錯，暫時未見有利好因素可以帶動港股大幅抽升。
大市反彈幾時都係騰訊(00700)行先，大市未重上100日線，今日騰訊先挑戰100日線，盤中曾見320.8元，半日報收319.4元，但留意較早前高位，即係330元水平阻力唔細，反彈至該水平，亦即係大市約莫去到27000邊咁上下。其他重磅股普遍向上，大笨象(00005)守得住63元，呢兩日反彈已先回補對上一下跌裂口，即管睇睇仲有冇機會收復10日及20日線，即重返66元水平之上。
內地承諾擴大開放市場予海外企業，友邦(01299)應該有得着，但股價喺65元有阻力，高開未能繼續高走，行到65元又掉頭，睇嚟66元阻力唔細，要重越此關睇怕要啲時間。其他重磅股升幅一般，港交所(00388)表現算跑贏，股價已重上10日及20日線，雖然近日港股成交低迷，但無礙其股價月內再挑戰240元。內房股升勢有餘未盡，阿man堅持唔高追，反而基建股愈戰愈勇，股價或有本事挑戰上月高位，有跟隨阿Man喺厼社交平台推介買入，目前仍可持有等升幅擴大。
至於噚日中途停牌嘅恒安(01044)，被沽空機構指其做假數，股價一文不值，公司出通告解畫，但市場似乎半信半疑，股價今日再逆市再跌4.8%，為表現最差藍籌股。兩日股價累跌一成，相對其他被沽空機構狙擊嘅股份，恒安表現相對冷靜。只係暫時恒安走勢偏弱，市場內既然有其他選擇，無謂冒險去博當頭跌。
麥狄文
(徐狄怡‧證監會持牌人)
