華為事件愈演愈烈，市場憂慮中美關係惡化，美股上周五先升後急挫，至今日喺新加坡黑期時段未能止瀉，拖累亞太區股市普遍下跌，港股當然無列外，跟住大隊跌鑊甘。恒指裂口低開268點報25794點，開市已失守26000關兼失守50日線(26011點)，早段跌幅曾收窄至218點，見過半日高位28545點。其後跌勢再加速，跌幅擴大至接近500點，低見22571點。半日恒指跌366點，報收25696點；國指則報收10247點，跌121點。不過半日成交額只有403億元，沽壓又唔算太大。
重磅股全線下跌，騰訊(00700)半日跌1.4%，短線騰訊喺300元有些少支持，不過國美國科技股有乜冬瓜豆腐，騰訊亦難獨善其身。美國加息周期隨時提前終結，國際金融股失去息差擴閣優勢，大笨象(00005)跟友邦(01299)分別跌0.1%及1.7%。不過大笨象剛好跌至業績公布後大陽燭頂部，相信喺63元有一定支持。中資金融股亦全線下跌，而中證監表示規管在港中資券商喺內地吸客，間接阻礙北水南流，券商股短線難免受壓。
華為事件再加埋蘋果銷情告急，手機設備股跌完再跌，整個板塊繼續走弱，跌幅至少超過1%，丘鈦(01478)跌得最勁，半日跌逾5%。新經濟股弱過藥煲，美圖(01357)喺呢個時候發盈警，股價再插7%創上市新低，半日報收2.82元跌6%，確係無眼睇。
受帶量採購中標價偏低拖累，上周已跌到走晒樣嘅醫藥股，又係一個被政策所殺死嘅板塊，步教育股後塵，跌勢急且猛，今早半日再跌，兩藍籌股石藥(01093)跟中生製藥(01177)分別跌5.4%及2.4%，成為表現最差藍籌，其他醫藥股閒閒地跌2%以上，藥明生物(02269)更跌13.6%。暫時醫藥股跌勢未止，莫買當頭跌，暫時咪多手接飛刀。
雖然港股弱勢已成，但今日已喺短期第三個裂口，恒指短線喺25500至25600點應有一定支持。只係本周三仲有米字旗國議會表決有關脫歐計劃，若然脫歐方案被否決，米字旗國至少插水一兩成，令整個歐洲股市動盪。至於美股亦未見起色，反彈乏力下，再加埋歐洲股市插水的話，港股定必受拖累。留意短線25500至25600點失守，恒指下一支持會係保力加通道底部25200至25300點；一旦保力加通道失守，港股穿前底機會大增。預期港股呢個星期走勢較為凶險，建議暫靠邊站，待米字旗國脫歐表決有定案再作定奪。
麥狄文
(徐狄怡‧證監會持牌人)
