噚日隻恒指Put(13962)已經無再喺個倉出現，因為好順利咁day trade咗，事發嘅經過係咁嘅：噚日朝早11點15分，恒指5分鐘圖嘅SlowSTC(14,3)就上到超買水平，呢個時候(13962)高低位做過$0.202/$0.200，平均數就即係$0.201啦，入市揸貨到下半場2點55分，恒指跌幅擴大返，5分鐘圖嘅SlowSTC(14,3)就由此前嘅超買回落返到超賣水平，一計之下(13962)快手就執咗七至八格。噚日恒指埋單跌200幾點收市，而(13962)收報$0.21，同走貨個位唔係爭好遠啫。
今朝早一出門口到返到公司呢段路好順利：一出門口就有升降機落地下；行到巴士站排好隊一擰轉頭，架巴士就埋站；巴士上面仲要無乜人，位任坐；返到公司大堂時這邊廂嘟完卡，那邊廂就有部升降機等埋我；要重要嘅係，返到嚟見無乜人，一開Google仲見到綠色同紫色食鬼火遊戲未完，拿拿聲打返鋪先開工，贏埋；可惜嘅係噚晚金多寶唔中呢！假如呢啲順利可以轉移到做trading嘅話，就真係正啦。
依家9點48分，開始有啲人返到公司，見恒指依家升151點，做緊24736點；戰友Jack一早表示對呢個點數唔滿意，咁梗係啦，噚晚美股升400幾點嘛，港股向來都係升又升得少，跌就跟足；不過唔緊要，各有各玩法啫。
噚日估緊假設個市再跌，會唔會會有資金開始反手追牛證/Call輪，今日一開恒指牛熊證街貨圖，係有資金入牛證架，但同時近熊都有唔少支持者，睇返個圖，最貼價嘅熊證(25300至25399點)噚日就有238張新增期指，至於最貼價牛證(24500至24599點)，就有221張新增期指，兩part嘅期指張數都係過千且係各自嘅重貨區。
依家9點59分，剛剛問完輪商朋友Gary借佢哋張牛熊證街貨圖喺呢度登埋，咁等大家一眼睇埋個圖更加清楚，再reload多次恒指，見到依家做緊24842點，升257點，用呢口價計數，若然由現價再向上行多458點，咁就可以行到上去熊證第一梯隊嘅門口位置(未食架)；反方向計現價落243點，就可以落去到牛證第一梯隊嘅門口位置(都係未食架)，單單呢樣比較就下行明顯係贏咗。
「熊證第一梯隊有1384張期指喎，呢個回合應該係熊證贏啦？」係嘅，但第三回合比較可持續食用街貨嘅後續嚟講，唔駛用計數機架，心算就得啦(都慳返，睇就睇到)，你睇返個圖，見到下方牛證嗰堆街貨，由第一梯隊打落五層，每層有500至800幾張期指喺度；但上方熊證，同樣由第一梯隊打上數五層，每層嘅期指張數介乎51至645張。
依家興可持續發展嘛，早兩日睇電視都見到有個廣告叫啲人食可持續生長嘅海鮮，同一道理嘅話咁都應該要食啲可持續食用嘅牛熊先啱嘅……
開牛熊證搜尋表見到有隻恒指熊(61660)有約32.98倍槓桿，但可惜街貨成98.18%，好受歡迎；恒指熊(63968)，收回價25347點，同現價有逾600點差距，槓桿約32.12倍，街貨27.05%，OK啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
