今日中午十二點，就係美國同中國再向對方加碼徵收關稅，而中國上周五已表明暫時唔返回談判桌，令中美貿易戰再添變數。其實中美雙方今次就算再坐埋枱傾，應該亦唔會有乜嘢結果，始終美國喺11月中期大選之前，唔見得喺貿易戰上面，會有乜嘢讓步嘅餘地，尤其「侵侵」目前民望高企，民意似乎對貿易戰唔太反感，亦有唔少選民贊同「侵侵」嘅美國優先主義，估計貿易戰喺美國11月中期大選前，都係咁上下。
不過講同實行又係兩回事，面對殺到埋身嘅關稅，美股上周五已見科技股率先畀反應，周五晚納指跟標指均見下跌，只有道指仍錄得升幅。至於港股當晚喺夜期跟ADR已見回調，今日低開後再低走，皆因上周五缸湖傳聞人行隨時宣布降準不似預期，未有出現，上周五急升嘅中資金融股，今日全線回吐，但回吐幅度唔算大，只可以講係上周五升過籠。
上周五已建議大家可以鎖定部份博反彈利潤過周末，今日大市回調，恒指暫時守住喺20日線(約27391)上面，但50日線(27811點)得而復失(27811點)。恒指低開169點報27784，已經係半日高位，一開即失守50天線，早段曾多跌398點，低見27555點。恒指中午報27603點，跌350點；國企指數報10852點，跌174點。半日成交額只有379億元，主要係明日中秋節假期，今日唔少人都放假自製長周末，預咗全日成交係歪豬豬。至於話上周五大市升成交超過1300億，大家就唔好太興奮，因為尾市有二百幾三百億成交，係涉及MSCI換馬，所以當日成交額都係一千億左右。即使今日成交因為假期前夕唔多，亦唔好以為係好大落差。
上周缸湖傳聞人行隨時降準放水，但睇番人民幣滙價已轉趨穩定，暫時冇乜降準需要，市場亦唔見得資金緊拙，既然降準唔成事，上周五炒到有啲過火嘅中資金融股，今日乘機回吐。不過睇番幾大行，暫時股價仍企穩喺20日線上面，暫未似要轉勢回落，只不過又係要抖抖氣，今日都唔會有乜睇頭。至於內房股又畀政策玩死，廣東醞釀逐步取消預售樓花制度，內房股即時跪低。碧桂園(02007)喺廣東省最多發展，股價半日跌5.7%，係半日表現最差藍籌股。其他內房股閒閒地跌3%或以上。汽車股亦見回吐，不過相對上周反彈升幅，今日回吐壓力又唔算好大。
今日大家都充滿放假情懷，唔多理個股市，加上期指開始轉倉，預期下半場變動唔大，後市能夠延續反彈嘅關鍵係27400點，亦即係20日線水平，當然能夠守住27600至27700點就更加好，可視今日為正常回吐。相反27400點水平失守，呢一輪反彈可能又玩完，大市會否再創新低，阿Man無水晶球答你唔倒，但就肯定又回復去唔生唔死嘅上落市格局。
麥狄文
(徐狄怡‧證監會持牌人)
