美國再向中國2000億美元加徵關稅，不過喺明年1月之前只係收住10%先，可能「侵侵」想過埋11月中期大選之後，再睇睇選民嘅反應，再決定場貿易戰點打落去。至於中國呢，只係同步向美國600億美元商品係咁矣徵稅，雙方表現克制，市場亦消化相關貿易戰消息。資金避險情緒放緩，股市又做番好，美股隔晚三大指數齊升，港股隔晚已經喺ADR同夜期偷步。
恒指今早高開85點，但隨即打回原形，重返27086點半日低位，回補開市上升裂口。其後A股帶動下港股重拾升勢，盤中一度升330點，高見27416點兩星期高位，暫受制20日線(27423點)。恒指中午報收27348點，升263點；國企指數報10715點，升158點，跑贏大市。
重磅股大部份上升，騰訊(00700)半日升2%，回購八日終於有啲成效，雖然以3萬億市值嘅公司，八日累計回購金額只得區區2.6億元，確係小巫見大巫，不過公司總算有誠意，持續回購即使難以刺激股價，亦能起到穩定股價作用。暫時騰訊反彈可挑戰20日線，即333.5水平，但股價定要先企穩320元樓上。
內地唔單止傳聞國家隊入市，更有傳聞指再進行定向降準，消息支持內地金融股上升，內銀股升幅由0.6%至1.5%，其中平保(02318)升幅更突出，半日升2.3%，突破前高位，較大市行前一步。另一方面，亦有傳聞內地有部門正制定住房貸款利息或住房租金扣稅細則，內房股炒上，大部份升幅由2.3%至6%不等。醫藥股經過連日被踐踏，今日終見較似樣反彈，不過都係嗰句，博反彈要見好識收，始終港股仍處熊市中，反彈隨時急彈急回，不能掉以輕心。
由於資金避險情緒減低，公用股有資金流走，大部份公用股均逆市下跌，其實呢個時候，正好為未來再出現嘅下一輪大幅下滑作好準備，不妨趁公用股偏軟收集。至於唔少績優股趁業績後落鑊，今日輪到玖龍紙業(02689)，不過早段大升7.7%，其後升幅大幅放緩，中午只升2.9%，小心高追又有伏。
麥狄文
(徐狄怡‧證監會持牌人)
