|
熱門:

2018年9月14日 即巿股評 港股直擊

【盤房來料】颶風殺到 缸邊友入場唔積極

隔晚「侵侵」又口多多,喺社交平台表示美國未急於要跟中國繼續講數,呢頭美國商務部已向中國談判代表團發出邀請,向中國表示有意重啟貿易談判,嗰頭「侵侵」又話美國大把籌碼,唔傾亦無相干,阿媽我好亂呀……咁即係傾定唔傾先?? 不過市場似乎已習慣侵侵嘅無定向風,雖然美股中段曾受相關言論影響,盤中曾大大收窄升幅,但最終三大指數仍然錄得不俗升幅,道指更重上二萬六水平,跟年初高位只有0.8%距離。

受美股帶動,加上美滙指數回落至95水平之下,貨幣走勢反映市場避險情緒有所緩和,港股隔晚喺夜期跟ADR時段,已順利企穩27100水平。今日恒指再裂口高開215點,開市後升幅曾收窄至12點,見27027點半日低,其後回勇再升304點,見27319點半日高位。可惜又係A股阻頭阻勢,令港股升勢回順。半日恒指收報27232點,升218點;國指則升53點,報收10556點。半日成交額不足500億元,預期今日周末前夕,加上缸邊友怕超級颱風山竹打到嚟,星期一可能受颱風影響休市,唔會積極入場買貨,今日成交要維持千億之上有啲難度。

不過重磅股個別發展,騰訊(00700)已連續五個交易日出手回購,股價亦從低位反彈,今日半場再升1.7%,報收329.4元。只要騰訊企穩喺325元水平,下一反彈目標大約係335至340元。大笨象(00005)連續幾日有北水掃貨,今日股價再升0.5%,能否重上20日線68.65,要睇北水肯唔肯繼續撐場。中資金融股則個別發展,建行(00939)續升,工行(01398)回吐;平保(02318)硬淨再升,中國人壽(02628)偏軟。

油價略為回吐,三桶油亦隨之回落,但相對之前累積升幅,石油股回吐幅度算算溫和。新地(00016)派完成績表有大行唱好,土炮地產股竟然喺呢個時候獲唱好,整個板塊今日有唔錯表現。內股則因為人民幣滙價略為回升,加上北京住房公積金管理中心宣布調整住房公積金個人住房貸款政策,有資金流入較大型龍頭地產股。不過阿Man再三強調,呢個時候係趁反彈減貨,見反彈貪心追入,小心走遲半步又變大閘蟹。

噚日港交所(00388)彈力強勁,阿Man都幾乎走漏眼,今日再下一城,幾乎收復20日線,唔知今次反彈有冇機會回補上次下跌裂口,即228元。港交所今年IPO集資額遠超舊年,喺港股風雨飄搖之際,港交所呢門獨市生意絲毫無損。加上港股步入熊市後,唔少股份高位已積聚唔少蟹貨,唯有新股乾乾淨淨,除非撞啱大跌市掛牌,否則今年新股登場初段表現唔錯,都有資金炒作。

留意新股華興資本

今日華興資本(01911)開始招股,集團主要係新經濟業務嘅領先投資銀行及投資管理公司,集團上半年總收入增至1.08億美元,同比增長達100%,單單睇番今年首季度,其經調整後淨利潤就達到3567萬美元,同比增加4.22倍,係罕有地已錄得盈利往績嘅新經濟金融服務股。華興資本上市,聽聞已有螞蟻金服、私人銀行LGT、雪湖資本(Snow Lake Funds)等大孖沙落飛,合共認購1.25億美元,成為基石投資者。IPO價為每股股份31.8港元至34.8港元,估值尚算合理,不妨小注怡情。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。