熱門:

2018年9月5日 即巿股評 港股直擊

【盤房來料】炒股仔小心成莊家點心

隔晚人哋美股力爭上游,早段三大指數顯著下跌,但尾段幾乎收復全部失地,跌幅大大收窄,但新興貨幣市場確係出咗事,令港股隔晚夜期跟ADR已先行退守27700水平,噚日港股報升260點,不過又係另一次嘅彈散。其實睇番噚日主板成交額只有721億,都見倒噚日又係一場「流星雨」,眨吓眼過去兼升勢流過流口水,純粹係為咗挾淡友,趕走淡倉做番場戲。

本以為噚日缸邊友按邊不動,大市都唔會太大變動,誰知下晝趁內地股市反彈,港股亦乘機挾淡倉,可惜無論現貨或期指,連二萬八個影都見唔倒,即係20個月線(恒指28106、期指28039)嘅阻力未能突破,噚日挾倉還挾倉,大市一浪低於一浪嘅弱勢難改。

好老實講,唔少人認為今個月大市好大機會出現熊二反彈,但暫時實在搵唔到利好因素,可以令大市出現較似樣反彈,自從上月底結算後,大市喺28500點水平雙頂回落,短線仍然係向下調整緊,即使要反彈,大市或先要下試日線保力加通道底部,即27081點,先會有較似樣反彈出現。除咗中美貿易關係再度緊張之外,新興市場日日同你玩爆煲,繼阿根廷跟土耳其先後出事,隔晚又到南非公布遠遜於預期嘅GDP數字,技術上陷入經濟衰退,南非蘭特急急插水。

新興市場貨幣弱過藥煲,對中港兩地股市絕對不利,尤其係資金繼續由新興市場流入美國,人民幣再度面對貶值壓力嘅同時,港元滙價仍疲弱。阿Man最擔心係美國聯儲局九月加息已無懸念,港息遲遲未跟住上,港美息差持續拉闊之下,資金流走,香港銀行體系結餘一旦跌穿500億元警界線,或令資金流走更快。

今早恒指低開184點報27789點,開市即失20日線(27865點),而內地財新PMI數據公布表現麻麻,令市場沽壓增加,恒指一度急跌逾500點,盤中低見27431點,期指更曾跌穿27400水平,低見27338點。中午恒指報收27512點,跌461點;國指則跌154點,報收10735點。

重磅藍籌股全軍盡墨,騰訊(00700)跟大笨象(00005)彈完一日又冇影,日線圖更驚見相當惡劣嘅走勢,兩股一旦失守前日低位,或會作較大幅度下跌。至於呢期跑贏晒其他藍籌,表現突出嘅平保(02318),亦漸有開到荼靡之感,77.5元兩度不破無功而回,小心見頂回落,有貨建議要先落車。本地銀行相繼調高存款利率,最優惠利率P加息係遲早嘅事,地炮地產股全線下跌。

由於重磅股均被資金離棄,竟然有個別三四五六線股仔落鑊,莊家都識把握機會。不過阿Man都係嗰句,莊家目標永遠係小股民同散戶個銀包,邊有莊家咁好死派錢,你估開善堂咩。就算跟勢炒股仔,最好係日日清,持貨過夜小心搞到失眠。話之啲股仔炒到出煙,本來醒目資金都唔係炒開呢類股,家陣熊市搵股嚟炒,貪字得個貧,何必衝去做莊家點心。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads