上周五美股先低後高，收市三大指數只有道指微跌，標指跟納指倒升，以為ADR仲企番上27800水平，誰知今早人民幣因為市場擔心中美貿易戰升級，人民幣又有些少腳軟，港滙又再逼近7.85弱方兌換保證，再加埋內地公布財新中國PMI見14個月新低，令中港股市齊齊腳軟。
恒指今早低開79點，開市跌幅擴大至180點，之後跌幅一度收窄至66點，見27822點半日高位，不過之後A股跌多咗，恒指亦跌311點，低見27577點。恒指中午報27623，挫264點；國企指數報10778，跌97點。
騰訊(00700)跌勢未止，上周內地出晒聲話要限制兒童及青少年打機，騰訊股價反彈告一段落掉頭向下，今早半日再跌3%，報收329.6元，目前走勢相當惡劣。對上一次低位319元一旦失守，預計股價大有機會跌穿300元，並向270元出發。另一重磅股大笨象(00005)走勢亦急轉直下，連續第二個裂口下跌，並已跌穿年內低位，現價相當接近100周線(67.85)，預計呢個位點都有支持，不過一旦失守，都咪話唔大鑊，有機會直指65元，甚至跌穿。
話咗之前炒得高，升得急嘅板塊，會成為缸邊友提款機，呢一輪到物管股被質，整個板塊沽壓甚大，閒閒地跌4%或以上，次一線嘅中奧到家(01538)更大跌8.5%。汽車股亦成拋售對象，市場擔心汽車企業爆發減價戰，汽車股全部插水，跌幅普遍超過4%。
今日表現較好嘅係光伏股，歐盟針對中國太陽能面板反傾銷及反補貼限制措施，將於9月3日正式解除，光伏股乘機炒上，不過阿Man講過N次，港股弱勢已成，即使有個別板塊落鑊，亦相當短癮，隨時一兩日無影，博反彈唔識落車，隨時得不償失。
大市方面，指數要睇住27400至27500點呢個位，一旦失守，恒指短線大有機會下試日線由上次反彈浪頂29000點伸延嘅保力加通道底部，即27000至27200點。呢個位再失守，上月低位26800水平亦危危乎。留意貿易戰發展，不過市場對於美國向中國2000億美元商品加徵關稅一事，已逐步消化，即使落實關稅，估計震盪只屬短暫而有限，反而新興市場貨幣危機，以及意大債務問題，一旦惡化，甚至出現黑天鵝，呢個先係對各地股市嘅致命傷。
麥狄文
(徐狄怡‧證監會持牌人)
