熱門:

2018年5月16日 即巿股評 港股直擊

【盤房來料】長方型橫行區無限輪迴

放咗接近一星期大假,港股就由三萬邊勁抽上噚日嘅31500水平,升足1500點,打破以往阿Man出門,港股例跌慣例,今次相反係勁升,反而返港後,噚日就開始回調。隔晚美股終止八連升,港股似乎早有啟示,噚日略為高開即掉頭,亦終止六連升,顯著回吐逾300點,收報31152點,而國指則報收12440點,跌103點。今日港股低開137點,跌幅一度擴大至333點,低見30819點,幾乎完全回補上周四所遺下嘅上升裂口30809至31151點,至100日線30861點見支持,跌幅逐步收窄,半日恒指報收31116點,僅跌35點;國指則報13432點,跌8點。

美國10年期債息升穿3厘,華爾街缸邊友又起戒心,隔晚美股亦回軟,嚟緊走勢如何,要睇吓中國代表團喺美國再進行貿易談判有乜嘢消息,將會再次主導美股呢幾日市況,皆因業績期過後,又冇乜其他重要數據公布,大戶要舞高弄低個市,都係靠消息。至於港股呢邊,由29800水平反彈,至噚日最高見31500點,反彈足足1700點,再一次接近大型長方型區間頂部,暫時整個大型橫行區喺29500至32000點,月初當大市稍為跌穿29800即展開反彈,至昨日升至31500水平回調,可能呢一輪反彈浪又係咁上下。坊間唔少圖表派認為大市已升穿下降三角形頂部,港股可以大翻身,但阿Man唔係咁睇,由二月見過29200水平至今,反彈一直未試過重上32000點之上,而對上兩個月兩次反彈至31600至31800水平已掉頭,唔排除喺呢個區域已累積一大堆蟹貨,而一般散戶喺呢個區域之內無限輪迴多次,資金多已被鎖,一係就已無膽再入場,除非大戶有心投入更多資金掃貨,否則五月餘下日子,仍有可能喺呢個區間內無限輪迴。

重磅股方面,騰訊(00700)喺放榜前仍腳軟,但今早見過390.6元低位後跌幅大大收窄,之前每次QQ公布業績前跌,翌日股價必升,唔知今次會唔會又係翻版。至於其他重磅股表現平平,低位普遍有支持,尤其大笨象(00005)仍受惠回購持續及息口趨升,近日走勢確係跑贏大市,暫時又上番78元水平。至於A股入摩被納入指數嘅建行(00939)及工行(01398)等四大行,由於H股現價高過A股,北水呢幾日都係沽貨為主,沽H買A係大戶呢期做法,暫時四大行股價唔會好有睇頭。

幾時都話醫藥股要逢回吐吸納,呢個板塊確無令大家失望,板塊內股份輪流破頂,今日較為吸睛係四環醫藥(00460),眾多醫藥股中,呢隻算係藥中之弱,今日大成交配合下急升一成似突破,估計完成圓底收集,升勢未必咁短一,唯一擔心係四環上面蟹貨重重,沽壓段段有,呢轉即管睇睇有冇本事升上2.375元阻力區,現價追貨用番今日開市價1.98元打靶,博唔博自己決定。

另一個阿Man今年至愛板塊教育股,同樣係段段有,個股輪住破頂創新高,無他嘅,上面冇蟹貨升得輕鬆,教育產業前景好,相關企業可保持高增長,當然值得睇高一線,跟醫藥股一樣唔受貿易戰影響,自然吸引資金流入當避險股。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。