Well，首先祝各位3歲至80歲嘅婦女(包括我)，婦女節快樂！(公司有蘋果派比女同事，等我都拎返個咬住打稿先)
噚日恒指(7日)高位見過30673點，升穿20天線；不過可惜後繼無力，剎那光輝之後就隨即下行。日線圖上噚日粒燭仍然被20同10天線夾住；今日恒指雖然開升，不過依家9點55分見到恒指暫時呈高開低收嘅格局，今日20天線(30607點)同100天線(30055點)愈來愈近，中期「死亡交叉」出現嘅機會率又再高咗，再者就算今日恒指見升勢，但仍然受制於20天線，「山頂纜車」格局仍然未變。
依家10點27分，恒指做緊30601點，升逾400點，用呢口價放上恒指牛熊證街貨圖睇，下方最貼嘅牛證係30000至30099點，但得21張期指；再落多100點，即29900至29999點，無貨？可能係一堆新上市嘅牛證仲未反映到街貨數量啫。第三貼嘅就係29800至29899點，呢度有相當於1104張期指，係最重貨嘅範圍。用恒指現價計算嘅話，由於今日個市都彈咗唔少，所以又同牛證嘅距離拉遠咗，現價向下行801點先可以殺得到落去29800至29899點呢度重貨。
上行又如何，熊證最貼價嘅係30700至30799點，呢度有相當於476張期指，同現價比就更係近啦，升多198點就食到啦。「咁近又有貨食到，咁個市應該都會向上行啦？！」嗯…係囉，噚日穿條20天線嘅時候個個都咁講架，到最後…大家都有眼睇啦呵？呢啲時間其實個市就等爆單邊，「三角形」出咗嚟啦！
意想不到嘅嘢又何止個市呀，話說前日有位舊同事Ming Ming話要「飯聚」，噚日lunch就約係銅鑼灣七個人一齊食啦，本來仲打算問Ming Ming無啦啦叫飯局係咪派帖，誰不知被我望到佢左手無名指帶上戒指，然後自爆上年11月已註冊，今個月擺酒；OK，低調結婚都明嘅，一班八公八婆再追問幾時生BB啦，得到嘅答案係今年7月就生…嗯…到底我應該祝你新婚快樂(但你都結咗婚五個月啦喎)，定係弄璋之喜會好啲(但係阿B又未出世)，anyway，你開心就得啦！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
