隔晚聯儲局新主席鮑爺首度出席聽證會，市場解讀其言論偏鷹，刺激美國10年債息重上2.9厘之上，又再逼近3厘警戒線，拖累美股三大指數挫逾1%。至於港股受美股跟內地股市兩面夾擊，半日顯著下跌，恒指低開低走，半日報收30743點，跌525點，半日一次過搞掂10日線(30771點)、20日線(31226點)跟50日線(30989點)，更失守三線滙聚區間，牌面睇落極不樂觀。至於國指更大劑，半日跌324點，報收12322點。
A股受2月份PMI失利所拖累，半日再跌逾1%，拖累內銀股及內險股顯著下跌，連同騰訊(00700)跌逾2%，港股梗係弱過藥煲。至於港交所(00388)中午派成績表，表現見得人，只係業績前炒足一個星期，股價已反映理想業績，預期業績公布後唔會有太大反應。不過阿Man仍睇好其前景，股價回落反而提供吸納機會，尤其今年開放同股不同權，定必吸引更多新經濟股上市，IPO呢瓣收入應該回升，更有機會重奪全球最大IPO集資額交易所，短線目標300元未變，升得穿前高位，可進一步上望320元。其他重磅股阿Man睇好銀娛(00027)，業績同樣交到數，加上上半場表現尚算硬淨，只要大市企穩，銀娛要向上挑戰高位無難度。
呢兩日港滙價高見7.828水平，接近當年海嘯高位，唔少缸邊友擔心資金流走，加上噚日北水錄得淨流出，走資講到似層層。其實當美債息上升，而港美兩地息差拉闊，港滙指數定必走向貼現窗高位一方，係咪走資暫時未能確定。至於北水噚日錄得2015年以嚟最大規模淨沽出，主要係依家北水累計流入遠超2015年，咁有短炒北水要食糊，淨沽出額度大過以前有幾出奇。況且睇番某啲板塊，如醫藥股、教育股、內需股等等，唔少北水愛股仍見有流入，即係北水並非一面倒走貨，更加有換馬跡象。
至於後市去向，阿Man唔係太悲觀，雖然噚日回補31600至31700裂口後急回，仲要跌成千點，淡友係似佔上風，不過30800水平，亦即10日線守得住，大市可能只係喺三線匯聚區間內上落整固。留意30800水平一旦失守，大市或有可能進一步調整至30500，甚至30200水平，剛好嗰個位係牛證街貨重貨區，未知大戶有否鋸牛扒意欲。
麥狄文
(徐狄怡‧證監會持牌人)
