隔晚美股表現反覆，不過最終三大指數報升，港股夜期已率先回升至29800水平，ADR亦回升至30000水平，今日港股順理成章再反彈，暫時喺30000點水平爭持。恒指今早高開184點，收復三萬點水平，開市後升幅收窄至129點，見29968點半日低，盤中最多升316點，見30156點半日高位，仍未升穿噚日高點30169點。恒指中午收報30068點，升229點；國企指數報12069點，升64點。雖然A股略見回軟，但未有影響港股回升，半日波幅收窄至200點左右，主要係大市成交縮水，過年提早收爐，波幅亦自然收窄。
阿Man一直強調，要大市回穩，首要條件係收窄波幅，自周一起港股波幅一直收窄，暫時守住100日線(30653點)，目前先喺三萬點水平打一打番實個底，踏入業績期，只要各重磅股交出一份靚靚成績表，大市或能重拾升勢。
恒生(00011)跟大笨象(00005)齊齊初五派成績表，今日高盛出報告唱好恒生，上調其目標價至220元，刺激其股價先偷步炒上，半日升5.7%，成為升幅最大藍籌。至於大笨象亦錄得逾1%升幅，暫時守住80元，但50日線(81.35)未收復，仍未算回復強勢。隔晚美國金融股有資金流入全線做好，港股呢邊嘅金融股則分道揚鑣，升跌有別，之前有北水捧場嘅建行(00939)、工行(01398)跟平保(02318)升逾1%，而弱開有條路嘅國壽(02628)，半日逆市再跌0.4%，已經連續第八個交易日下跌。至於騰訊(00700)跟港交所(00388)分別升1.1%及0.3%，好老實表現平平唔算強勁，要大市上去回補30400點裂口，兼重返50日線(30640)，幾隻重磅股要給力。
不過今日港股總算定落嚟，即使A股見腳軟，港股仍能企穩三萬大關，過去兩日港股午後見沽壓，尤其係三點過後回吐壓力湧現，估計係同成功博反彈獲利盤趕住套現過年有關。數一數手指，明日就係交收日，要沽貨過年前收錢，T+2即係噚日最後沽貨限期，今日或者少咗呢一浸沽壓，港股就可以企定定喺三萬水平收市。至於北水已暫停交易，成交明顯縮減，要提醒大家，鬼子佬係冇過農曆年嘅概念，無咗北水掃貨，或者由西水補上，只要西水唔係掉轉槍頭沽貨，港股就算唔再升，亦已能止住跌勢。
大市波幅收窄轉趨穩定，鑊剷友又入場炒過，今日唔少半新股都見資金追捧，小賭王入股兩成嘅澳能建設(00183)，噚日開市潛水後迅速重回水面，今日見炒家雲集，股價一度炒上1.63元，半日報收1.52元，留意1.5元能否企穩，站定住腳有條件再炒一會，否則要考慮食糊。至於之前提過生不逢時嘅雅生活(03319)，上市首日潛水後，其實連續四個交易日上升，暫時股價仍然未浮上水面，招股價12.3元，現價仍低咗成蚊咁滯。無記錯因應市況轉差關係，雅生活IPO定價已由13元樓上減落嚟，即係若非市況轉壞，雅生活早以高於13元上升，現價仍有一定值博率，買入以10.8元昨日收市價作止蝕，五毫博一蚊有數圍。
麥狄文
(徐狄怡‧證監會持牌人)
