噚日恒指又係臨尾發力，連續第四日創歷史新高；基於有啲怯大市呢啲「超買再超買」嘅情況會突然「Boom」一聲玩完，於是揀咗隻極度樣衰嘅吉利(00175)出嚟，終於等到下半場3點25分到，見吉利SlowSTC(14,3)踩入超賣區，順利地將隻吉利Call(29277)小注落場。今朝早見恒指再創新高，開市升212點，見32606點，到正式開市之後更曾升逾300點，見過32700點樓上，吉利亦由我行緊返公司時見到升3%，而戰友Jack就話我隻(29277)升25%；到我返到公司10點到吉利升逾5%，而(29277)更爆上升58%，隻Call升到咁，唔使教都知道係收割嘅時候啦。
同老媽係Whatsapp吹完兩句水，再上埋老友魏力條文之後，依家10點34分，恒指升230點，做緊32623點，最高做過32729點，用呢口價放落恒指街貨圖上，就知道今朝恒指已經殺入32700至32799點呢個熊證區，呢度有相當於417張期指，亦由本來第四貼價區變成依家最貼價嘅熊證，而佢對落嘅32400至32699點呢三個100點範圍，total嗰1312張期指，好明顯已經變成咗大戶今朝嘅早餐。
至於下方嘅牛證，最貼價嘅都只係31500至31599點，同現價確係仲有成千點距離。坦白講如果牛證同現價嘅差距keep住有800幾點至過千點嘅距離，而同時上面熊證都keep住有幾百張期指駐守的話，為咗要湊夠期指張數，似乎都只能將個市繼續推高，向上食熊證；咁就暗示大市將會繼續創新高，分分鐘創到你班友仔麻木為止。(係唔健康架，但個市要咁行，吹咩？)
不過，都係嗰句：要大市升都要比啲動力，而動力就係嚟自股份升。噚日隻吉利今日走勢上日線圖SlowSTC(14,3)%K線底低升穿%D線，兼升穿埋條「下降通道」，坦白講追多日都唔怕，不過要預咗今日先起步追嘅所得未必如噚日追、今日收割嘅咁多；仲有(29277)已經噚日嘅輕微價外變成今日嘅價內，所以要轉過第二隻輕微價外Call，吉利(19922)，行使價26.9元，價外約2%，引伸偏低、槓桿適中，且成交活躍，屬考慮之選。
另外一隻「野獸」估計會係全世界都唱緊資源股今年會翻生嘅昆侖能源(00135)，由1月3日開始至今築起「下降通道」，日線圖SlowSTC(14,3)嘅%K線同%D線雙雙跌到得返個位數，依家10點55分，昆能暫時升0.4%，報7.68元，若然明日一，唔貪心就當佢彈一到上條10天線(7.825元)，講緊同現價升1.9%，如是者同現價有約2%差距嘅昆侖Call(11453)就真係fit到爆，(11453)行使價7.38元，高槓桿低引伸亦係另一賣點，唯一有啲擔心嘅係昆侖屬於較二三線輪， 冷門嘢都真係唔好預咗成交好活躍，你願唔願做「美女」一次，博呢隻「野獸」明日會見技術反彈變「王子」，就要視乎今日有無靚位比你入啦；重點係，「美女」都係唔應該賭錢，所以小注怡情好啦。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
