上周美國賣債算不過不失，拍賣息率屬市場預期之內，連同歐洲央行放聲續買債，美股強到無朋友，舊經濟主導的道指六連升，標指也連升四日，上周五美國十年債息又上番1.6厘樓上，睇怕納指會被炸散，但納指盤中最多插1.8%低見13398後，全日只跌0.59%，明顯比預期中強得多。
美債升穿1.6厘後不回，周六卻見到比特幣抽穿六萬美元大關，再創新高，連同道指連升六日，反映風險胃納未有縮細，或者大家都諗住拜登1.9萬億美元，足以撐起股市。
美銀：納指頭肩頂喺熊市陷阱
現時市場相當分化，睇跌的投資者認為，一旦債息再升50點子，納指可插兩成。不過美銀就認為，之前納指100指數跌穿頭肩頂頸線(12764至12845)，但其實喺熊市陷阱，尤其納指止跌回升收復頸線之上。(註：上周五收造12937)。
美銀重申美國科技股唔喺見頂，認為納指100仍可牛氣沖天，相信下個大位會升至13312至13564水平，即上次裂口下跌底部。
觸發今次科技股大跌，元兇喺擔心通脹升温，扯高十年美債債息，但講真喺咪真喺咁驚，絶對值得商確。
尤其自2008年金融海嘯發生後，全球出力狂印，根據歷史經驗，理論上惡性通脹升到不得了才正確。不過，13年後的今日，超高通脹又真喺唔多見，只喺睇到股市好多股價升咗唔少。
所謂未來數個月會見到通脹好勁，或多或少與疫情有關，尤其去年4至6月美國通脹只有0.3%；0.1%及0.6%，相對現時疫情，經濟活動比一年前好，在低基數效應下，通脹稍為高一點又何出奇。
全球狂印唔見高通脹
更何況，疫情影響各行各業運輸造成瓶頸，加上產能又因疫情減少，價格自然就高企，正正是今日晶片業面對的寫照。
反而，值得深思喺為何全球狂印13年後，點解依然谷唔起通脹。筆者當然唔夠班講呢D，但引述兩位基金基理稱，由於全球老年化及出生率下降，變相人口減少，自然產生產能過剩問題，加上新能源成本比石油低，連同科技令效率大幅提升，最終通脹想升都難。
就喺創新的力量，納指調整時就應該要掃入，而能力創新弱的企業，但又驚比股東捽，但求冚住股東把口，唯一可做喺不斷回購推高股價。
台積電可低吸
睇番實際情況，美國科技股確實調整唔少，故此本欄美股假倉也加上唔少科技股。另外，之前強到不得了的台積電(TSM)，作為全球最大的代工商，生意根本接唔砌，加上股價比其他科技股波幅較細，可穩定組合表現。
組合之內未有拋售資源股，始終金屬價格走強仍是主要賣點。至於多晶硅生產商大全新能源(DQ)，上季純利大升3.8倍，單是去年第二至四季毛利率分別為17%、36.1%和44.2%，預期市盈率只有16.8倍，在太陽能前景秀麗下，加上多晶硅產能不足，連同回歸科創板上市，估值現時明顯合理，甚至喺偏低。
不過，要留意大全新能源股價波動好大，最好80美元樓下才入第一注，止蝕放在70美元。
作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周一、三在「信報網站」及「港股360」撰文。
（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）
歡迎訂購實體書 電子書：https://bit.ly/ejbook141
