熱門:

2019年10月25日 國際財經 即巿股評

【環宇搜股】留意金礦及政治事件受害股

全球股市點穴,正在公布業績的美股,標普五百指數在3000點咬住唔放,港股則在過去十個交易日打橫行,高低位區間在26386到26984上落,齋睇指數可用「悶爆」來形容。

炒業績股人都癲

市場十個有九個半都嗌炒股唔炒市,但落注賭業績可以嚇到面青。例如咁啱唔好彩買中隻Twitter,上季純利大跌95%,隔晚股價即刻倒水大跌兩成。若一廂情願諗住華為5G失勢,對手諾基亞會有運行,但原來5G太燒錢,諾基亞業績差過預期外,更唔派股息兼削今明兩年預測,上日股價也大插23.7%。

還有上咗神枱的亞馬遜,由於要為Prime會員提供即日送貨服務,變相開支增加,累第三季每股盈利僅4.23美元,比市場估計的4.62美元低,盤後延長交易時段即跪低,股價下挫6.73%,造1661美元。

不過,今次美股季績有個特色,就是除微軟外,其他軟件及雲計算類股份掟到一仆一碌,相反硬件類股份贏到開巷,尤其半導體設備公司如Lam Research季績好過預期,隔晚大升;而Applied Materials獲大行升評級至「買入」,股價也飆9%。仲有隻Tesla,第三季意外賺1.43億美元,上日狂抽17.7%。一句到尾,而家賭業績股等同射十二碼,一喺入,一喺唔入,完全博唔過。

高盛貼儲局鴿變鷹

高盛唔知喺咪收到風,下周聯儲局會減四分一厘,但預言突然會由大鴿變大鷹,首先是鮑威爾確認利率中期調整將收工,其次是刪除聯儲局採取合適行動以維持經濟擴張步伐的字眼。

對於高盛的預言,暫時好難判斷,一旦不幸被該行仆中,股市難免會有一下大調整,但再望最近聯儲局行動,在昨日隔夜回購操作額度和定期回購操作額度,分別由350和750億美元,上調至450億及1200億美元,同時在永久公開市場操作(POMO)依然錄大幅超額認購,即喺市場水沿依然緊拙,會唔會喺聯儲局供高盛過橋製造煙幕?

金價升破降軌

金價似有開車兆頭,隔晚一口氣跌穿20天線(1493美元)及下降軌(1500美元),走勢有望轉好,一旦突破保力加通道頂部1521美元,金價有望抽升,劍指1600美元,現價喺時追本港或美國上市的金礦股,甚至喺白銀ETF,以金價失守1470美元止蝕。

另外,可留意下本港政治運動受害股,不單可重新回歸地產股(以新世界(00017)最睇好),也可意留意太古地產(01972)、九置(01997)、利福(01212)、港鐵(00066)及希慎(00014),主要是中美貿戰緩和,連帶大規模的本港激烈衝突咁啱亦有縮細跡象,加上憧憬聖誕至農曆年旺季,股價有望沖喜,目標睇升一成半至兩成,以今年股價低位止蝕。

不過,上述建議是假設聯儲局下周議息會唔會突變大鷹,一旦儲局不幸變臉,必須留意情況,安排緊急撤退計劃!

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads