美股上周五再創新高，而夜期繼續上升，ADR更升至33400點水平，今早恒指裂口高開181點，一度升幅擴大至329點，再創33484點歷史新高。不過高位有沽壓，大市掉頭回落，最低見32945點，回補上升裂口有突，倒跌209點。不過市底實在係強勁，低位迅速反彈，跌幅大大收窄，中午報收33142點，僅跌11點。國指則升68點，報收13792點。
半日高低位波幅高達539點，預咗大市波幅擴大，所以呢啲水平真係唔適宜太高槓杆或大量使用衍生工具，否則抵受唔住即市過山車波幅，好易被淘汰離場。上周五阿Man已經係食住花生等收市，結果大市破頂以全日高位收檔，雖然按兵不動未有加注，但亦未將平貨沽出，只係將短炒部份股份減磅套利。
睇番指數重磅股四大股王，今日表現認真麻麻，騰訊(00700)早段曾創476.6元上市新高，但其後倒跌10元至466.4元低位，中午跌幅收窄至0.8元，報收470.4元，暫時要睇守唔守470元。至於港交所(00388)又係一上300元樓上就掉頭，半日跌1.6元，報收295.8元，暫時破咗條10日線(296.8元)，收市前唔上番，走勢開始轉差。至於平保(02318)開始轉弱，今早大市升已顯得乏力跟上，大市回落平保跌勢即加快，盤中最低見90.2元，半日報收91.25元，企唔穩92元，短期大勢已去。至於大笨象(00005)又被美國指控期貨造假，股價暫時難升，不過85元又算守得幾穩，始終息口向上對其有利。
內銀股繼續係升市火車頭，建行(00939)高見9.39元創新高，半日升勢回順，報收9.18元，升1.4%。工行(01398)升逾2%，同樣破頂，而中行(03988)則升至兩年半高位，半日升1.5%。其他內銀股全線上升，郵儲銀行(01658)跟重農行(03618)創新高。只要北水繼續掃貨，內銀股可以維持強勢。
資源股今日亦有運行，唔單止三桶油上升，今早表現最勁係煤炭股同金屬股，不過阿Man對資源股一向有戒心，食少多教訓，樂於最觀眾，寧願錯過升幅，亦唔願高追，免得又高位被綁。
呢個星期FOMC會議，耶媽將會發表離任前最後一次講話，未知會否為今年美息路徑提供線索，但全球收水係事實，息口向上亦喺預期之內，地產股難免受壓，今日半場內房股同陀地地產股皆見下跌。
若要問阿Man，今早大市逼近33500點即回吐，港股短期是否已見頂，暫時真係答你唔倒，尤其大市跌穿三萬三即抽上，反映買盤仍然強勁，唔排除喺農曆新年前，港股仍會以大漲小回姿態繼續向上。值得留意係今個星期除咗FOMC會議，明晚侵侵發表國情咨文，另外本周稍後時間仲有非農數據，都有可能成為震倉藉口。
麥狄文
(徐狄怡‧證監會持牌人)
