噚日尾市愈跌愈有，隻恒指熊(66170)真咗好多收割，話唔激氣就呃你嘅，咩原因最後連23000點都無埋？又唔可以話係因為林鄭無啦啦出嚟嘅(雖然喺聊天室打趣地話「可能一開聲講第一句『各位傳媒 朋友大家好』，23000點即刻穿埋，又真係被講中喎)，但佢今次出嚟都真係無好嘢，而今次就係因為新疫變種病毒Omicron喺市區有蔓延嘅情況，所以宣布進一步收緊社交距離，由聽晚開始堂食又係去到六點，表列處所停止營業十幾日。雖然今Round只係停兩個星期，但如果臨屆滿之前又出嚟講再延長多兩個星期嘅話，咁今年嘅團年飯大家都喺屋企見啦。Anyway，呢單嘢只能話革命尚未成功，同志們仍須努力。
今日恒指完U之後，再向下跌多60幾點，開市報22843點，繼續踩住牛證屍骸向下落，而22800至22899點呢層牛證，為最貼價層，有相當於400張期指街貨。本來噚日見到五分鐘圖上Slow STC(14,3)臨尾收市跌到落去嚴重超賣水平，小注出好倉過夜博見觸底反彈，誰不知噚日收市完U之後就已經彈起，今日再掉頭向下，好倉唯有搵逃生門。
依家9點50分，我家肥貓終於肯走返入之前被人捉嘅暖暖窩度瞓得香甜，而港股今日都叫做做返好少少，起碼見升，而過夜小注好倉都勉強捉得到Sloe STC(14,3)觸底嘅走勢，或者港股真係太弱雞，恒指依家只係做緊22964點，升幅擴大過後又再收窄返，至目前升56點。
「既然個市咁弱雞又出好倉嘅？」一來如前文所指只係博Slow STC(14,3)過夜後會出現觸底反彈一下，諗住收工；二來博如果個市真係可以做返好少少，那怕係大跌浪中捉得到一個小回調都好，小時圖見其實Slow STC(14,3)都有見到準備做觸底反彈，咁當然小時圖行得仲慢過五分鐘圖好多倍啦。只可惜從五分鐘圖見到其實今朝指數高開出「大陽燭」之後，就被條100分鐘線(五分鐘圖20線)同250分鐘線(五分鐘圖50線)挾住，真係動彈不得，其後再向下穿番所有平均線，怕且下方牛證都凍過水。
恒指熊(66585)，收回價23300點，同現價有約340點差距，約45倍槓桿係好進取嘅DT熊，依家10點11分見指數已經掉頭向下再創今日新低，聊天室都幾次呼籲大家走好倉兼反手，好難期望指數可以彈高返少少比位入隻(66585)，不過安全嘅都係等下好，同噚日入市策略一樣，進取嘅吼天線位見阻力小注進場，安全嘅等返條Slow STC(14,3)上返超買先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
