「又話今日Day off」，做人嘅嘢又不得懶到咁嘅，趁仲有啲時間，都想望下隻恒指。噚晚見歐洲股市跌到出現小股災咁滯，原因都不外乎英國當地疫情惡化，先後有超過30個國家同地區宣布禁止英國航班入境，或收緊對來自英國旅客嘅檢疫安排，當中梗係包括曾經話過唔比其他人入境係「歧視」嘅香港啦；我前上司嘅愛女正正就係喺英國讀緊書，當我知到話唔比英國嚟嘅機Landing嘅時侯我都即刻whatsapp佢，可能得到一個前下屬嘅慰問，佢忽然爆出一肚怨氣：我已經叫佢買定日用品同糧食架啦，因為都傳緊話連貨都唔比出入，到時就真係變荒島啦！你慌死佢會去捕魚咩？講完呢句，唔好話我，連佢自己都忍唔住笑咗；而我只係見到一個阿媽係可以點樣緊張自己個囡啫。
依家9點49分，本身今朝見到日經都跌過200點，但可惜恒指喺5分鐘圖上SlowSTC(14,3)已經落到超賣水平，技術上暫時無辦法令恒指有咁樣嘅跌幅出現，就算到依家恒指都暫時做過最低嘅26204點，換股之可以將牛證第一層街貨26200至26299點全數死亡，而呢度有相當於203張期指；不過，喺26100至26199點先至係戲肉，因為呢度有成778張期指，係牛證嘅重貨區，即使技術上依家已經見5分鐘圖上SlowSTC(14,3)喺超賣位出反彈，但面對重街貨，又真係咁容易放過？
再望返噚日Bookmark咗嘅港交所(00388)同SPDR金ETF(02840)先。
先睇港交所，今朝股價高開後現(9點56分)隨大市下行，至依家已經倒跌0.5%，報$401。日線圖上SlowSTC(14,3)兩線已於80以上嘅超買水平%K線跌穿%D線，不過暫時見保歷加通道口仍然拓闊，且今日粒燭尚未完全走返入保歷加通道裡面，若然今日$400呢個關鍵位守唔住嘅話，開淡倉嘅勝算就會增加，可以繼續觀察住先，就算真係想開佢淡倉，都應該等佢5分鐘圖條SlowSTC(14,3)上返超買位時先好出手(依家10點1分見已經落到超賣位lu)。
至於隻SPDR金ETF，日線圖見今日直頭係裂口下跌，噚日嘅陰陽燭已經變成粒「射擊之星」，SlowSTC(14,3)好明顯%K線跌穿%D線啦，只係問題都係喺5分鐘圖見SlowSTC(14,3)目前處於超賣水平。噚日如果大膽出咗揀咗嘅S金Put(11254)，按輪價依家什升11%都總算有交代，只係今日再追(11254)都要等靚位先好入市。(11254)嘅行使價為$1222.22，因為今日SPDR金ETF跌低咗，所以依家屬價外約10%，只係小心冷嘢未必旺場啫。
今日[下半part]真係會無架，唔好以為會無啦啦出現呀！
明日續。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
