噚日騰訊(00700)係威係勢咁上去$600樓上，仲咬住呢個位收市，見到佢咁火辣辣，追上又怕接火棒，但唔做任何嘢又好似好唔抵咁，於是轉頭走去搵咗佢個Friend美團(03690)，仲揀定隻美團牛(52108)出嚟。不過，噚日下半場唔單止恒指同騰訊強，連佢都頂住死也不落，搵個位吼下都無，這邊廂我怕重蹈噚日騰訊牛入唔到，眼白白見佢創新高嘅覆轍；那邊廂又擔心自己一時被炒到火紅火綠嘅市迷惑，忘記晒落場操作嘅守則，天使同魔鬼嗌咗一個下晝交之後，結果都係咩都無做到。
到今朝起身時見到電話message話噚晚美股跌逾900點，有啲慶幸miss咗隻美團牛；到依家10點13分，恒指低開逾400點後跌幅收窄至跌297點，24411點，聊天室室友們都開咗恒指牛等，至於美團今日有一刻逆市倒升，至依家做緊$279，跌緊0.36%，硬淨到呢...
恒指今日一跌，將牛證最近嗰三層街貨全數死晒，呢度夾埋有相當於1439張期指，而吼咗好耐嘅25000至25099點嘅重貨熊，睇佢嗰樣都似有神功護體。
望返日線圖見恒指一下子下行到20天線(24294點)，SlowSTC(14,3)就繼續向下走，之前畫嘅「上升通道」已經完全失守，話就話今日會唔會趁期結做好，但又從來無人講過期結會做好，只係有印象記得早兩日有講過恒指日線圖條SlowSTC(14,3)都上到80至90呢個位，唔得閒做Day trade嘅話可以選擇開Put，只係喺聊天室講過，還是喺呢度講呢？年紀大唔記得啦。
「唔緊要，咁依家開始put佢囉」睇穩條20天線先啦，如果守得穩變彈床又另一回事啦；By the way下個星期就美國大選，大是大非前後，落場要小心呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
