噚日相信大家一係排除萬難、攀山涉水咁先返到工;一係就索性唔返,Home office,我係後者。全日幾乎喺屋企開住個直播台睇出面嘅情況,同時又望住電腦睇住個市,事關噚日大市係仍然運作,仲一度跌逾500點,收市係跌少咗啲,不過連條50天線都無埋,大市又再次處於五條主要平均線以下。
基於噚日開市無耐見恒指已經企喺牛證街貨層,於是就揀咗隻再貼價少少嘅恒指熊(67055)出嚟,雖然無講低話吼恒指5分鐘圖見超買先至落場,但其實個市連續兩日裂口下挫弱,有心追沽嘅都應該無乜耐性去等到5分鐘圖見超買就落場。就按住噚日朝早SlowSTC(14,3)處於一個相對高嘅位置11點10分至11點35分嚟計,呢段時間(67055)高低位做過$0.109/$0.1,平均買入價就係$0.1045。
都唔使等好耐,喺下半場1點15分至2點10分,恒指5分鐘圖SlowSTC(14,3)已經回落到嚴重超賣水平,由於(67055)噚日揀嘅時候槓桿都有逾50倍,所以亦係適合day trade之用。按上述mark低個段時間(67055)高低位做過$0.118/$0.114,即平均賣出價就係$0.116,對比朝早嘅平均買入價,即平均賺幅為11%。
不過,噚日嘅焦點應該唔係喺港股,係公布第三季業績嘅騰訊(00700),大約就喺我睇緊警方記者會嗰時就出咗業績,就話第三季賺203.8億人民幣,按年跌13%,遜預期。當大家都驚緊騰訊業績今日會唔會影響個市之下,見今日騰訊股價都裂口下挫,依家10點5分,日線圖上見騰訊做粒「倒T星」,同恒指一樣現水平處於各平均線之下,但SlowSTC(14,3)只係回落到中軸水平,借佢嗰份遜預期嘅業績嚟伸多佢一腳嘅話,暫時唔好住啦。
依家10點7分,似乎恒指開始走出一個比較明確嘅方向,恒指依家做緊26468點,跌102點,最低暫時做過26393點,換言之牛證第一層街貨26400至26499點嗰434張期指已經全數死亡,變相26300至26399點呢一層上移至最貼價牛證街貨層,而呢度就有相當於567張期指,屬第二重貨區;再向下行殺牛證街貨的話,其實落到去25700至25799點呢度,中間每層都有100至300幾張期指街貨喺度,多就更係唔係多啦,但總叫做好過無咁解。
再追跌唔係問題,但要小心日線圖上恒指現水平同保歷加通道底(26155點)相差不遠,且SlowSTC(14,3)亦準備進入嚴重超賣水平;不過見依家啲熊證最貼價嗰隻嘅收回價都同現價有912點距離,都真係好安全,要小心嘅係啲街貨,最貼嘅街貨高到見100%啦。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家
#輪證贏家 #輪證下半Part #warrantsandcbbc