熱門:

2019年11月5日 港股直擊 即巿股評

【盤房來料】攬炒股市有難度 港股繼續平行時空

美股三大指數齊破頂,中美貿易談判首階段簽署協議,似乎已無懸念,至於之後續協議,美方就話要睇中方點樣執行,即係交番個波畀中國。阿Man相信係以和為貴嘅大原則抵下,貿易戰最終都可以大和解,問題係仲要幾長時間,同埋雙方點樣完美平衡大家利益。不過能夠踏出第一步已經係天大喜訊,咁美股咁炒法,無理由中港兩地股市唔落力少少追上去。

港股噚日成功收復250日線,重返牛熊分界線之上係重大突破,今早雖然見少少回吐,但回吐壓力真係好有限,早段曾掉頭跌過83點,見過27463點半日低位之後,迅速拗腰回升,最多升148點。半日以接近高位27694點收市,升148點;國指中午報收10889點,升75點。

財新中國10月服務業PMI雖降至51.5,但仍符合市場預期,加上人民幣今早進一步做好,離岸會一度高見7.0226兌1美元,睇嚟七算魔咒有機會破解,人民幣滙價敏感股份做好。噚日阿Man話過內地航空股除咗受人仔滙價影響,油價走勢對航空股亦有一定影響力,所以都係帶住矛盾向上炒。反而呢,內房股就少咗呢個顧慮,今日內房股表現唔錯。加上多間內房企業10月份銷售情況唔錯,梗係要乘機落鑊。今日半場內房股全線走高,升幅由接近2%起標。估計喺人民幣持續走強下,內房股應該仲有得去唔會咁短癮,內房股係值得關注。

另外有消息指中證監官員表示,將盡快公布有關H股全流通工作指引,並進一步修訂QFII氶RQFII制度,以拓大境外機構投資者進入交易所債市投資渠道,並研究擴大期貨特定範圍。睇嚟呢個消息可支持全流通股炒番鑊。事關H股落實全流通,即係中資股流通市值將大幅擴容,呢個消息將帶動中港兩地股市投資氣氛,而中資券商股料可受惠。此外,以內地股市作為投資重心嘅內險股,隨住H股估值重新修復,亦有正面刺激,內險股同樣有炒作理由。

上星期阿Man提到5G概念股長炒長有,今日呢個板塊股份亦有追捧,今早喺其他平台曾推介中興通訊(00763),股價半日升逾2%。講真美國為與中國達成貿易協議,願意放生華為,相信對其他科技及手設企業係好事。講番個市就梗係唔沽得,恒指已開始企穩250日線之上,呢個咁硬淨嘅表現,可帶領大事繼續向28000甚至28300點進發。雖然香港係客觀經濟環境下仍充滿挑戰,但有阿爺出力維穩,香港政局再難拆,社會動盪亦好,港股仍然能平行時空,隨外圍股市做好,睇番有部份示威者好希望做到攬炒,望住個樓市同埋股市呢四個幾月嘅表現,攬炒呢一招真係唔多岩用。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads