熱門:

2019年7月11日 港股直擊 即巿股評

【輪證贏家】恒指保歷加通道中軸見支持

噚日個市係悶,但對於恒指熊(50590)嚟講,都仲叫做有兩個出口位。一個就係噚日都係[下半part]講過,喺1點5分至1點20分呢段SlowSTC(14,3)超賣位,(50590)高低位做過$0.071/$0.065,平均賣出價就係$0.0675。第二個出口位就係喺下晝2點40分至2點55分,SlowSTC(14,3)都落到去超賣位,當時(50590)高低位做過$0.072/$0.068,平均賣出價就係$0.07,比早段時間賣得好少少,夠車錢比我噚晚收工之後搭車同友欄麥狄文+杜比三條友撐檯腳,係呀,大拿拿由九龍灣坐兩個站到觀塘架,哈哈!不過真係好多謝杜比穿針引線下先認識到麥狄文,再有幸得到佢嘅邀請,喺三人行必有我師之下,我噚晚上咗一堂「金融業發展史」,仲得到好多寶貴意見which is我會盡力用我「工餘」嘅時間去逐步逐步完成。

今朝起身(其實到依家都仲係好眼瞓)見到聯儲局主席鮑威爾在國會暗示月內減息嘅新聞,唔使審,呢單嘢一出更係會彈起個市,見今朝恒指開市先升143點,報28347點,到依家10點16分,恒指升幅大幅擴大至28542點,升337點。呢一步跨上去就由近牛證街貨,反方向殺上熊證街貨範圍,變相踩咗入最貼價熊證28500至28599點,而呢度有相當於914張期指,如果將呢一層街貨再拆成50點為一層嘅話,其實28500至28549點呢度已經全數死亡,呢度有相當於233張期指,換言之喺28550至28599點呢度先至係真正重貨位,有相當於681張期指。

開恒指日線圖睇,今日恒指明顯一粒陽燭裂口彈起,截至依家10點25分止,恒指最高見過28582點,係輕輕穿過咗條10天線(28566點),雖然頭頂仲有一條100天線(28631點),不過呢個走勢至少可以話到比你知,恒指喺20天線/保歷加通道中軸(28247點)附近有彈力,可以將臨跌出邊皮位嘅恒指一嘢彈返入去。反手追Call/牛證真係無問題嘅,不過都係嗰句:喺5分鐘圖搵到位入市咪得囉(開咗市成個鐘都仲係見到5分鐘圖SlowSTC(14,3)頂住喺個頂到...等吓先啦)。

作者阿珊,任財經/投資版傳媒人十幾年,《鐘擺戰策贏港股》作者。用技術分析專心玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads