噚日成日都無落場,原因係見到貼價牛將會愈出愈貼,個市吽咗兩日好明顯係比時間好淡雙方角力,等大家都有充分嘅時間去「買定離手」:買牛定買熊。依家就搞到兩邊注碼都好鬼大。
今日開恒指牛熊證街貨圖睇,上方熊證變化不大,最貼價嘅29400至29499得返相當於117張期指嘅街貨,明白嘅,大家都睇住嗰條「天梯」一樣嘅「上升通道」做人嘛(係做Trade);而第二(29500至25955點)同第三層(29500至29699點)仍然都有過千期指期街貨駐守。而最多新增街貨量嗰一層就係第四層(29700至29799點),好明顯買熊嘅開始將個重心向後移,無他嘅,都係因為嗰條「天梯」啫。
至於下方牛證,今日所見最貼價嘅仍然係28900至28999點,而呢一層亦都係最多新增街貨層,有相當於1141張期指嘅街貨;而第二層(28800至28899點)反而就只有232張期指。要再落多一層(28700至28799點)先至見重貨,而呢度就已經儲咗1195張期指,再落多一層(28600至28699點)都有1076張期指街貨坐鎮,兩邊果然係不相伯仲。
睇返恒指走勢,依家10點20分,恒指升64點,現價報29388點,最做過29425點,即係踩咗上上方熊證嘅第一層少少位置;而最低做過29315點,同下方第一層牛證嘅距離有584點(講緊只係去到門口)。而恒指現價仍然挨近保歷加通道頂(29516點)。留意返,SlowSTC(14,3)嘅%K線正式高位跌穿%D線,雖然係咁,但始終現價同下方第一層牛證都真係有逾500差距,今日超級星期四(九萬幾隻重磅大藍籌業績),不過唔使多,正所謂「騰訊(00700)業績如何,恒指的走勢也必如何」,殺邊邊就真係睇大佬啦;我喺側近做吓傻強算啦。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#