今朝早同平時一樣,都係9點5分落樓,15分上車,平時就35分到就落車,但今日唔知做乜連隧道都未入就係咁塞,塞到出咗隧道都仲要塞多陣,跟手上到繞道先至無事,返到嚟,斟埋杯水,依家都10點14分lu。
噚日就揀咗隻恒指Call(11718)出嚟,一如以往,吼5分鐘圖見SlowSTC(14,3)出現超買嘅話就視為(11718)落場位。喺朝早11點30分,恒指5分鐘圖SlowSTC(14,3)見超賣,呢個時候(11718)高低位見$0.033/$0.032,中位數$0.0325就作為買入價;至於第二個落場位就可吼2點10分,(11718)高低位咁啱都係$0.032。
若然按平時嘅策略的話,喺噚日下晝2點45分,恒指5分鐘圖一度見SlowSTC(14,3)出現超買水平,但呢個時候(11718)輪價做$0.034,計落條數都只係得兩格落袋,除非你一格就幾百萬上落嗰啲啦,否則呢個賺幅根本就唔會吼(分分鐘連手續費都唔夠比)
承如噚日喺[下半part]所講,噚日下晝見恒指日線圖上垂「射擊之星」,即有遇頂回落之意。今朝恒指開市先跌7點,喺我塞緊車嘅途中我仲可以企喺度,用個手提電話上咗兩篇稿咁大把,根本就無睇到個市,返到嚟見知個市跌幅擴大至依家10點24分跌116點,做緊27080點,最高暫時見過27223點,連熊證第一格嘅27300至27399點邊皮都無掂到。
至於下方牛證,最貼價嘅係26600至26699點,街貨比噚日多咗,相信係大家見到個市超買到咁都仲可以再上,莫非係傳說中熊市裡頭嘅技術調整?嘿,就呢個部份嚟講我嘅知識薄弱(你叫我用Dow theory去畫浪,我永遠只會畫到一幅好似鯊魚擘大口嗰柵牙出嚟,你search吓兩樣嘢對比吓你就明架啦)
每個人嘅function唔同嘅,個個一樣咪唔好玩囉,繼續睇返啲日線圖。今日恒指下行但技術上仍然守住條150天線(27030點),且10天線(26781點)升勢未變,似乎個目標仍然係向上升穿150天線。與此同時,今日最低嗰條20天線(26179點)悄悄地升穿咗條50天線(26164點),又生咗個「黃金交叉」出嚟,明嘅,恒指升咗咁多日都可能會有人話天線係用過去嘅數值計算而得出嚟嘅結果,所以係有少少滯後嘅表現;但係市場上又的確有唔少人因為見到有「黃金交叉」或「死亡交叉」,而走去買/沽?你無?你問吓你隔壁嗰個,你問埋你前面嗰個,再唔係你上forum問吓人。
拆開恒指5分鐘圖,見今朝開市恒指下行後再橫行,而同一時間SlowSTC(14,3)都係由開市時中軸水平下行至超賣位,再喺超賣位作窄幅橫行,即係話個市今日雖跌,但佢跌得嚟分鐘圖上見超賣,暴跌嘅空間有限之下,(11718)或者你手上其他嘅Call/牛證,都應該採以快打慢嘅方式去迎戰呢個市。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#