美國兩黨尚未能就提高債務上限達成協議，其實大家都預咗唔到死線，協議唔會達成，美股就借勢繼續調整，三大指數下跌。美國債務上限問題喺死線前未能達成協議，惠譽將美債AAA加入負面觀察名單，即係會有被調低評級嘅可能，美股當然借頭借路再隊多日。不過輝達（NVDA）公布業績，股價盤後急升近三成，扯高納指，美股升勢仍然集中喺幾隻重磅科技股。阿Man反而擔心係，目前美股升勢過份集中，一旦債務上限喺下周達成協議，美國財政部會急急發債，屆時又會抽走市場資金，而嗰堆重磅股無以為繼再唔可以支撐大市，咁美股就有機會出現較大調整。
港股本身已經係弱底，美股又調整，再加埋人民幣走弱，進一步創今年低位，拖累中港股市齊齊插水。恒指低開185點，甫開市已失守19000大關，人民幣低處未算低，大市跌幅擴大，最多跌402點，見18713低位，創近六個月新低，半日接近低位收市。恒指半日收報19720，跌395點；國指跌147點，報6330；恒科指收3682，跌93點。半日成交額550.42億元，較上日略為上升，不過呢啲位成交都未算急增，仍未見到有資金肯低位大手接貨。
藍籌股全線向下，大笨象(00005)半日跌1.6%，友邦(01299)半日跌1%，港交所(00388)半日跌近2%，更失守300元重要支持位；內地金融股亦全線走弱，建行(00939)、平保(02318)跟工行(01398)全部跌1%或以上。至於表現最差嘅東方海外(00316)遭大行調低評級至「減持」，半日跌7%。科網股表現疲弱，不過小米(01810)業績表現唔錯，經調整後淨利升13%，升0.6%，係少數半日逆市上升嘅科網股。至於ATMJB全線向下，騰訊(00700)半日跌3.3%，阿里(09988)同樣跌3.3%，京東(09618)跟美團(03690)齊跌逾4%，百度(09888)跌近2%。
除咗科網股表現疲弱之外，汽車股表現亦疲弱，小鵬汽車(09868)首季虧損擴大，半日跌8.4%，蔚來(09866)半日跌9%；理想汽車(02015)算係汽車三傻之中表現較強，半日跌0.5%，已經係跌得最少嘅汽車股。比亞迪(01211)兩車型號遭長城汽車(02333)舉報排放唔達標，比亞迪半日跌2%；長汽、廣汽(02238)跟吉利(00175)跌1.7%至3.2%不等。
港股失守萬九大關後，更失守18800呢個3月份低位，一旦未能於兩三日內修復，定必考驗下一個支持位18300至18500。期指結算前，淡友全面進攻，睇嚟好友喺結算前都無力反擊，有心博反彈，都係等過埋個長周末假期，今日不如提早收工，培養一下放假心情。
麥狄文
(徐狄怡‧證監會持牌人)
