四日復活節假期你哋點過？行街？去郊遊？同屋企人野餐？還是喺屋企靜靜地咁過？我係最後嗰款，事關我家老爺放四日假病咗兩日，不過臨放完假前已經好復，生生猛猛上班去(是咪打工仔其中一隻悲歌？)。
更悲嘅係，四日假期結束之後返嚟恒指完U即跌逾400點，指數由以上個星期四(4月14日)收市價計靠近熊證街貨，一下子變返靠近牛證街貨，再望望街貨圖，見到牛證街貨層20900至20999點儲落有過千張期指喺度，怕且呢層都係凶多吉少。
換個日線圖睇，指數其實4月7日到依家都未曾重上20天線以上位置，今日再向下跌，以依家9點54分計，恒指低位暫時見過20910點，即係話過千張期指重貨牛證仲有10點先叫做全數死亡，唔緊要呀，都死得八八九九啦；同以呢個低位向住3點17日大上升裂口再量度的話，當日裂口闊度為666點(好魔鬼呀)，而裂口範圍為20786點至20120點，計一計即暫時低位同裂口頂部只係爭124點。
再望多次牛熊證街貨圖。下一層比較多街貨嘅就係20700至20799點，呢度有相當於902張期指，而呢個位一到，亦即表代指數正式進入大上升裂口嘅裂口頂部位置。假設指數真係誓要補返嗰大裂口的話，即指數要落返去20120點嘅裂口底部，以目前牛證街貨所見，會橫跨20500至20599點嘅第二層過千張期指街貨層，而20300至20399點都叫做有578張期指。試諗下，如果指數再向下，作勢補裂口咁款，你估聽日返嚟見到嘅牛證街貨，會再重啲定輕咗？
恒指熊(69297)，收回價21685點，同現價有逾560點差距屬安全，約21.78倍槓桿都唔顯得特別大咬，因為真係想等下指數可唔可以補到個大裂口。
提多你一樣嘢，日線圖上今日見到10天線跌穿20天線，發出短期「死亡交叉」，五條平均線已經倒序排列啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
