雖然隔晚美股終止四連升,但道指期貨喺亞洲時段回復升勢,帶動港股高開。不過今晚美國聯儲局有議息結果,即使都唔會太特別,除非係負利率啫,否則美息已經歸零下,議息結果經已唔重要,反而係聯儲局點睇未來經濟發展先係焦點。另一方面,美國今晚有唔少經濟數據公布,始終呢段時間公布嘅首季及4月份數據都會好嚇人,缸邊友有擔憂係正常,港股半日先高後低。
恒指高開210點,開市即收復50日線(24598點),盤中一度升279點,見24855點半日高位,但之前阿Man講過,上番50日線都好,24600至25000之間阻力頗大,一到阻力位即掉頭,升幅一度縮水至得番13點,見過半日低位24589點,其後喺50日線好似有少少支持,半日叫做企住24600水平。中午恒指報收24641點,升65點;國指半日報收10053點,升69點,不過預咗長假期前成交較淡靜,加上無埋北水,半日成交額只有460億元左右。
藍籌股個別發展,騰訊(00700)去到420元前有阻力,半日升轉跌,中午跌0.4%,小心420元呢個位若未能突破,有機會形成雙頂。至於大笨象(00005)呢期都係40元上落,業績出咗係唔靚仔,加上今年內都唔派息,即係今年內都唔會有運行。不過咁,始終疫情過去之後,一切都會漸漸回復正常,大笨象遲早都會派番息,有貨喺手呢啲位走都無謂,無貨就唔好手多。內銀股陸續公布業績,暫時內銀股都應該會維持派息,不過壞賬問題肯定難解決,仲要肩負國家任務扶持企業渡過難關,唔少要硬食幾多債仔賴賬,總之都係嗰句,銀行股呢一兩年唔慌有好表現,未有貨嘅唔好無啦啦走入個屎氹度。
紐約期油日前急挫後反彈逾一成,帶動石油股及油服股反彈,不過講真原油庫存問題未解決,石油倉儲短缺下,油價易跌難升,阿Man都係老規矩,呢個板塊反彈都當睇唔倒,亦無興趣入場博一轉。
今日內需股嘅食品股沽壓較顯著,萬洲(00288)上季業績倒退近兩成,半日跌逾4%,拖累其他食品股亦下跌。不過食品股都係反覆,今日腳軟跌一跌,話唔定三兩日後又炒番上去。
比亞迪電子(00285)發盈喜,因為生產口罩,加上主要客戶份額持續提升,令今年首季盈利按年增長近七成至6.57億元人仔,更預期截至6月底至中期盈利按年增長不少於2.8倍,帶動股價半日升8.7%。之前阿Man有推介過比亞迪電子,目標價正正係18元,家下超額完成,長假期將至,有貨先食糊亦無壞。
麥狄文
(徐狄怡‧證監會持牌人)