熱門:

2019年11月12日 即巿股評 港股直擊

【輪證贏家】揀定熊證準備再落

噚日恒指裂口下跌,最多跌逾800點,低見26830點,將本來嘅牛證街貨區26900至26999點嗰過千張期指街貨全數張制收回。拆開5分鐘圖就見到由噚日下晝2點開始至2點半做出低位嘅呢段時間,恒指對住重貨區猶如開咗一槍咁;其實都唔止,留意返低位係26830點,即係話26800至26899點呢part嘅街貨都有唔少傷亡。

承如噚日所指,喺上星期五(11月8日)已經留意到恒指波幅指數(VHSI)處於嚴重超賣水平,反彈勢在必行;而VHSI一彈就代表個市將會出現一個較大波幅嘅走勢,噚日嗰8XX點嘅波幅,總算對VHSI有交代。

至於今日,大跌過後作少少反彈亦都無可厚非,依家10點4分,大部份同事都未返到公司,應該喺準備放飯嘅前後時間就會陸續出現,Anyway,安全就夠啦;不過,恒指現報26973點,升幅比今朝開市收窄至得返升46點,日線圖上見恒指現價處於20天線(27022點)水平之下,如果今日收市時都爬唔返上條20天線以上的話,即代表恒指由保歷加上升道通下移至保歷加下降道通。

呢個就真係要再睇牛熊證街貨圖點啦。今日所見恒指牛證最貼價嘅係26800至26899點,呢度有相當於161張期指,而重貨區其實好遠,講緊喺25000至25099點,呢度有相當於726張期指。不過造淡嘅唔駛咁灰心,其實係第二層街貨區,即26700至26799點呢度,已經有637張期指駐守,無他嘅,大家都係博大跌過後出現反彈啫。

至於上方熊證有六層新增街貨,所以熊證最貼價落到去27300至27399點,而呢度就只有相當於72張期指。稍為有多少少街貨可以見得人,再上多100點就可以,呢度就有相當於477張期指。

依家10點30分,同同事吹咗一陣水,大家都開始返到公司,總算安全。計一計恒指牛熊證街貨中間位,即(27300+26899)/2=27099.5,按依家恒指現價同中間位相差100點,都唔係一個出手好時機,話唔定今日恒指升少少,引多啲牛證入場,儲夠貨之後再向下殺過都未定。

恒指熊(67055),收回價27548點,同現價有逾500點差距,槓桿比率約40倍屬同一收回價中最高嘅一隻,低街貨亦係另一個重點。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads