上個星期五(10月5日)揀咗隻恒指熊(61460)出嚟，去到11點10分見見恒指5分鐘圖SlowSTC(14,3)由超賣走返上去超買水平，呢個時候可以視為第一個入市位。到下半場開市後，喺1點35分再次見到SlowSTC(14,3)再浮返上去，之後2點15分都係，呢兩個可以視為第二同第三個入市位。
如果按上文所講嘅三個入市位，一貫用返高低位拉個平均數作為價入價嚟講，分別係$0.119、$0.1165同埋$0.108，除咗第三個買入位叫做有一格賺幅之外，其餘嘅都仲坐緊，特別係第一個位入，坐得最深(甚至可能已經中途走人)。
不過見到牛熊證街貨仍然偏重牛證，而且新貼價熊仲未趕得切面世；再加上恒指勢頭仍弱，所以就選擇(61460)過夜。本來都好地地，誰不知喺風和日麗嘅星期日(7日)中午12點鬆啲同我家老爺諗緊一陣食乜嘅時候，收到台send嚟嘅message：「人行下調部分金融機構存款準備金率1個百分點，置換中期借貸便利操作MLF。」吓？即係放水啦，心都怯埋，頓時食龍肉都覺得無味；but well，冷靜一陣之後諗深一層：我又唔係多貨，況且之前係咁食熊證都食唔少，拉上補下都仲有斬獲嘅。
直至今朝，恒指開市升145點，但見騰訊(00700)係U盤時跌低過$303呢個低位，就開始估開市呢一彈就只係比面「降準」，難道今日係彈散市？依家10點2分，我已經坐喺位度乖乖地打緊呢隻稿，剛剛同事Louisa放底咗疊invoice比我，同佢講句「唔該」時順便望一望個電視機，噢，原來隻熊賺緊5%至15.7%，網已收。
再睇恒指日線圖，依家10點8分，恒指最低暫時見26394點，上星期五低位就26373點，日線圖上呢兩個位呈「平底」，SlowSTC(14,3)%K線(7.068)同%D線(21.026)有準備觸底反彈之嫌，DMI嘅-DI同+DI有收窄情況，即使今日個市見「散彈」，但形態上恒指呈一浪低於一浪下行，咁有浪即係有上亦有落啦，換言之恒指好有可能今轉下行結束，又完成咗「一浪」，準備展開第二個「一浪」。
依家10點13分，恒指報26444方牛熊證街貨圖見上方熊證最貼價嘅係27500至27599點，呢度有相當於1414張期指，同現價比有11565點差距；至於下方牛證，最貼價嘅係26300至26399點，呢度都有784張期指駐守，同現價比只係差144點，「下行咁近又有唔少街貨係度，點解唔再向下衝？大戶唔係開善堂大家都知，但須知道吊頸係真係要唞氣，儲多啲貨再一次過殺唔係仲慳水慳力咩？依家見恒指5分鐘圖跌到落超賣，反正個心15/16，試吓paper trade牛證睇吓會唔會死先。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
