噚日揀定隻恒指熊(59713)出嚟，喺11點20分見恒指5分鐘圖嘅SlowSTC(14,3)有返個小山丘出嚟時，就拿拿聲將隻(59713)送落場，那時證價$0.09(高低位計都係呢個價)；到去《下半part》(大約2點59分)，(59713)做緊$0.119，如是者就食咗29格，對小妹嚟講已經足夠，所以網已收。
而喺噚日《下半part》時都有講話，若然大家見個市跌勢未止，想追今日續跌嘅話，就建議大家揀貼價Put，唔好熊證，事關先係擔心今日嘅波幅無噚日嘅7XX點咁大，逐吓逐吓由價外變價內咁樣食仲安全。
今日踏正9點20分，恒指U盤做完一開就裂口跌268點，開市報26840點，27000點終告失守；不消15分鐘，我已經落車再行到返公司樓下等𨋢上埋樓啦，一開電視就見到條簽寫住「恒指二萬七關失而復得」，咁快？明挾啫，令我諗起噚晚喺討論區見到有人講話「0920穿270，冇仇報；0945上返270」(即係9點20分時恒指穿27000點；到9點45分，即正式開市後15分鐘就挾返上27000點樓上)呢個forum果真高手雲集架。
依家9點56分，恒指暫時做過嘅低位就係今日個開市價26840點，低開高走到依家跌54點，做緊27072點，形態上今日粒燭係低過噚日架啦，下行軌跡未變。至於街貨嚟講，今日一插就殺死晒27000至27099點同埋26900至26999點呢兩part牛證，1936張期指今日隨開市即死，繼續向下望嘅話就數到26600至26699點先有過千張街貨駐守，但同現價比嘅話，就要現價起步向下跳多472點先食得晒，又唔係話無可能嘅，400零點對依家個市嚟講都唔係話無可能一日做唔到嘅事，而且，途沿計落夾埋有成1771張期指。BTW，都係嗰句：殺埋呢堆街貨，恒指日線圖上都仲未跌到落去保歷加通道底部(26314點)。
至於上方貼價熊喺27700至27799點，同現價比有逾700點差距，魔咒位(即28000點)呢度就有1257期指等緊你，問題係在於個市要有氣有力彈上去啪穿呢個魔咒位先得。
依家10點8分，恒指仲轉跌為升11點，做27138點，波幅上都講緊有349點架啦，開市兜Call/牛嘅人都有可能收咗工，搵位再開第二注；依家5分鐘圖見恒指SlowSTC(14,3)頂到頂，好明顯係「特價熊時段」，恒指熊(61453)，收回價27538點，同現價有近500點差距，屬全場最高槓桿熊證，貪心鬼嘅不二之選；另外，恒指熊(69343)，收回價27800點，同現價有逾700點差距，夠安全。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
