美股呢期係消息市，一個消息話白宮經濟顧問科恩辭職，美股應聲而下，道指期貨插水幾百點，轉個頭，有傳聞話「侵侵」要留人，希望科恩唔好離開白宮，或邀請佢另擔重要職務，美股即收復失地。至於貿易戰嘅相關消息，亦一直左右美股去向，隔晚美股一度因為市場擔心指替代科恩係鷹派人選，將加速貿易戰爆發，道指曾跌逾三百點，但後來白宮放風，即使侵侵簽署關稅計劃，當中仍有好多細節有得傾，而楓葉國及墨西哥則獲得暫緩，講到底都仲有得傾。市場對於貿易戰嘅負面情緒得到紓緩，道指收市跌幅顯著收窄，納指更倒升。
港股隔晚已喺夜期反彈，ADR更重上30400點水平，今日港股繼續向好，恒指今早高開326點，報30523點，升幅曾縮水見半日低位30428點，但其後A股轉跌為升之後，港股升幅擴大，盤中最多升480點，高見30677點，半場報收30631點，升434點；國指則升184點，半日報收12364點。大市已成功收復20日線(約30610)，不過仍未滿足阿Man大市脫險要求，至少要破埋條10日線(約30773)，仲要企穩兩條移平均線之上，港股先可以真正脫險。口痕友話，家陣個市日日玩單跳，今日開雙，明日開單，邊度有得估。一向係好友嘅阿Man，有信心港股今個星期應可以脫險，至少要扭轉弱勢，當然搞掂埋條50日線(31191)就最理想。當然侵侵咪再玩嘢，美股都要生生性性，否則本來可以出院嘅港股，畀美股嚇一嚇，就只有喺ICU同普通病房之間出出入入，出院無期。
幾隻重磅藍籌股，今日最標青當係平保(02318)，股價半日升逾3%，報收84.6元，重返20日線之上，除咗有大行出報告唱好之外，有消息指分拆陸金所已入晒form，如無意外最快可以下月上市。分拆陸金所一直令市場期待，完成分拆陸金所之後，咪以為平保就收工，嚟緊仲有平安好醫生等住拆，平保好快又轉入直路，再一次向高位出發，短線就先睇番90元。至於其他重磅股，今日反彈逼近10日或20日線，一旦衝破平均線阻力向上，將帶動大市重新挑戰三萬一大關。
講咗幾日炒股唔炒市，咁究竟港股開邊未呢，阿Man估計都快，只要今日下半場，恒指繼續穩守20日線之上，更理想當然係升破埋10日線，咁就可以突破三角旗形爆上。雖然唔少好友都話大市仍有跌穿三萬點危機，講真條100日線逐步上移，而今日上半場恒指每一下破頂，回調幅度都少過一百點，同過去幾日chok上chok 落情況有所不同，除非美國又出岔子，睇嚟港股都儲夠力要上爆一段。尤其噚日道指期貨冚包散時，港股仍然守喺三萬之上，連條100日線都唔多願落去考驗，已露出好友正部署反擊之端倪。
麥狄文
(徐狄怡‧證監會持牌人)
