雖然美股上周五偏軟，而道指期貨喺亞洲時段仍未見回升，但港股上周兩升兩個交易日，恒指反彈逾800點後，今日反彈升勢持續，半日再升逾500點，升至9月中以嚟高位。恒指高開323點，報25161點，已為半日低位，其後升幅擴大，半日最多升560點，見25398點半日高位，亦逼近50日線(25462)。恒指中午報升553點，報收25391；國指重上9000大關，半日升250點，報收9025點；恒科指升幅達3.7%，半日升227點，報收6434點。
ATM成為大市火車頭，美團(03690)被市監局罰款34億元人民幣，及要求履行社會責任，罸款較預期少，市場解讀為「罰款可解決監管問題」，消除不明朗因素，市場相信內地對於科網股嘅監管應告一段落，資金從新流入科網股。美團半日股價急升近一成，跟阿里(09988)半日升幅相約，為表現最好兩隻藍籌股。騰訊(00700)半日亦升近3%，其他科網股普遍有理想表現，升幅由半成至接近一成不等。大部份恒科指成份股都錄得不俗升幅，唯獨聯想(00992)回A計劃打退堂鼓，取消回歸科創板上市，半日股價跌近15%，報收7.52元。究竟當局對科網股嘅監管係咪就此罷手，阿Man未敢肯定，但事實上，不同科網巨科被罸款後，暫未見監管當局再向其出招，似乎錢解決到嘅問題，真係唔多係問題。
隨住能源價格高企，市場已傾向相信通脹並唔係短期及暫時性，不過就業數據反映聯儲局並無收水嘅逼切需要，但美國10年期國債孳息升穿1.6厘，反映息口走勢趨升，帶動金融股做好。大笨象(00005)半日升2.2%；恒生(00011)半日升1%，已連升第六個交易日。不過內銀股則個別發展，建行(00939)逆市下跌；招行(03968)半日升4.7%。至於保險股以內險股表現較好，友邦(01299)半日逆市跌1.2%。
暫時就只有科網股跟金融股表現較好，其他藍籌股表現平平，上周反彈嘅本地地產股回吐，而內房股喺恒大(03333)事件仍未解決下，普遍偏軟，資金選擇遠離呢個板塊。之前科網股走弱時，強勢嘅電力股、化工股等今日回軟，資金從新湧入科網股，其他好多板塊都逆市向下，反映市場並未有新資金流入，資金只係喺不同板塊輪動，繼續塘水滾塘魚。
麥狄文
(徐狄怡‧證監會持牌人)
