美國聯儲局議息,一如預期維持利率不變,而全局委員更表示未來一來都唔會加息,維持目前利率政策不變,即係寬鬆貨幣政策將維持一段時間。呢個訊息令美股回升,終止之前幾日跌勢。而港股則重上二萬七關,半日成交亦有所回升。恒指高開192點,開市後升幅隨即擴大,曾升403點,見過半日高位27048點,創11月26日以嚟高位。恒指中午報收26980點,334點;國指報收10620點,升118點。
重磅藍籌股當然跟住大市升,騰訊(00700)終突破悶局,難得重上340元再升逾2%,下一阻力區為350元至355元,亦即8月5日所遺下嘅下跌裂口。而友邦(01299)半日亦升逾2%,但已逼近80元阻力位,家下再追就有啲尷尬。而大笨象(00005)先後有高盛及美銀唱好,但留意技術走勢方面,59至60元阻力較大。聯儲局唔加息住,陀地地產股借機反彈,不過基於香港經濟今季及下季表現唔會好,阿Man對呢個板塊仍有戒心。
早兩日阿Man已講咗,中國日後會加強使用本地生產科技零件,以減少對進口零件依賴,尤其係晶片股將受惠政策傾斜。而隔晚美國城半導體指數升逾2%,半導體股再全線炒高。而內地亦已表示政府機關將逐步轉為使用本地電腦硬體及軟件,今日軟件股亦有不俗表現,希望資金能停留,唔好似以前咁,炒一日半日咁短癮。
除咗半導體及軟件股,手機設備股亦再落鑊,小米(01810)一話推出價格夠競爭性嘅5G手機,噚日股價即急升,今日喺10元之前遇阻力,睇嚟需要高位整固一下,但其他手機設備股則有資金追捧。丘鈦(01478)發盈喜,又有大行唱好,半日股價升近12%。比亞迪電子(00285)及信利(00732)分別升2.9%及3.9%。
每到冬季又係燃氣股銷售旺季,而港華燃氣(01083)獲大行唱好,半日股價升6.2%,帶動其他燃氣股上升,而阿Man亦較睇好中燃(00384)及華燃(01193)。其他板塊都係跟紅頂白,之前升得勁嘅醫藥、物管股及內需股等,雖然今日亦有跟大市回升,不過上升動力有限,睇樣仲係有計數盤沽貨離場,限制咗反彈升勢。
麥狄文
(徐狄怡‧證監會持牌人)