噢！恒指噚日好地地企喺牛熊證街貨中間位，而今日就選擇向上爆；依家9點44分，啱啱返到嚟斟好杯水，見友邦(01299)升1.1%，做緊67.85；而友邦熊(66189)嘅高低位就係$0.041/$0.034，拉個平均數就即係$0.0375，而依家2點33分計，(66189)做緊$0.025，真係嚇到心都離一離。
竟然已成定局就唯有繼續硬住頭皮頂硬上。開友邦日線圖睇，明明見到友邦已經連穿五日(計埋今日)條保歷加通道頂，明明SlowSTC(14,3)%K線同%D線已經齊齊上到嚴重超買水平，只係噚日%K線做95.812，%D線就93.938；而依家%K線就96.447，%D線就做緊96.595，即係話噚日個超買都仲有啲啲水位再上，隻(66189)唔通就係輸比嗰啲啲水位？今日%K線低走於%D線，先100%確認高位掉頭？如是者即係你依家話比我知我係早咗入市呀？媽，你知唔知隻(66189)槓桿唔細架？友邦咁樣升一樣，(66189)打靶位同現價又拉近咗，講緊依家返3%唔夠，好貼價架大佬！
依家10點8分，搵同事Josephine幫我打堆英文出嚟之後(佢係負責我所有英文系列嘅formal嘢，包合約、各式各樣嘅信...好勁架！)而我後面news同事個電視機「熱播」林鄭，應該係講緊個長者綜緩單嘢，再望返我隔離部長期開住財經台嘅電視，原來恒指已經升咗300幾點，依家做緊26622點；再睇埋友邦5分鐘圖見SlowSTC(14,3)上到嚴重超買水平，坦白講去到呢個位(66189)點都要搵個位安置佢，但如果喺呢個嚴重超買水平走嚟止蝕嘅話，確係令人有啲灰心；反正小注貨又唔多，且日線圖都同步出現嚴重超買，無嘅何不唔等分鐘圖回落時先止蝕？正所謂輸少一格得一格嘛；堅係有信心嘅，咁就頂住呢個位，博多日睇吓，順便考驗吓自己嘅心理壓力(明白係好大壓力架，但有時對住個咁飄忽嘅市，落得場嘅就真係要有一個咁嘅心理質素)。
加油！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
