聯儲局議息前，隔晚美股維持強勢，道指及標指再創歷史新高，道指升224點，標指升36點，納指亦升逾1%或172點。不過反映中概股表現的金龍指數卻跌逾1%，港股ADR收市跌逾百點，夜期跌逾200點，重返15800水平。都預咗今日港股低開，恒指開15896又唔算太低，不過一開就再失20天線(15958)，開市價就做咗個高位。
內地股市表現疲弱，港股跌幅擴大，半日最多跌402點，見15674半日低位，幸而條10天線(15619)仲守住，跌幅略為收窄。中午恒指收報15764，跌313點；國指跌117點，報5192；恒科指跌2.7%，收3117。半日成交額499億元，樂觀去睇就回吐壓力唔大，成交縮減；但悲觀去睇呢，又落返萬六樓下，減價都無人願買貨。
隔晚中概股表現差，已預示今日重磅科網股走弱，騰訊(00700)、美團(03690)跟小米(01810)半日跌逾2%；阿里(09988)跟百度(09888)半日跌1.5%，已經算跌得少；京東(09618)半日跌3.1%，網易(09999)半日跌4%，攜程(09961)跌5%，之前強勢已消失得無影無踪。
金融股亦顯著下跌，只有大笨象(00005)半日仲靠穩，無起跌；友邦(01299)半日跌3.6%，65水平嘅支持原來咁脆弱。A股跌跌不休，雖然阿爺已出招限制融券沽空，不過有實貨喺手要掟貨，A股一樣止唔到血，平保(02318)咁重投資喺A股，A股唔掂，內險股都要陪葬。恒大(03333)被本地法院勒令清盤，市場憂慮更多內房未能成功債務重組，到頭來都係拖累內銀股，三大國有銀行股跌不足1%算係咁，始終有阿爺撐腰，但商業銀行如招行(03968)就跌3%。
恒大清盤有幾多後遺症仍屬未知數，會唔會影響到搞緊債務重組嘅其他內房股，市場似乎有一定憂慮，內房跟物管股亦係拖累市場氣氛嘅元兇。龍湖(00960)半日挫7.3%，藍籌股中表現最差；華潤萬象生活(01209)跌4.8%；碧桂園服務(06098)跌3.9%；就算有央企背景嘅中國海外(00688)跟華潤置地(01109)半日亦跌逾3%。
雖然阿爺已宣布降準，並於下周生效，但傳聞中嘅平準基金，以及其他救市措施只聞樓梯響，市場明顯仍未有信心，似乎救市措施力度不足。港股暫時仍然未能扭轉弱勢，即使反彈或未結束，但市場信心一日唔恢復，港股都係有波幅，難有升幅。短線反彈阻力為萬六大關，早前升破後屬支持，但呢個支持不堪一擊，較大支持為10天線，再失守向下，反彈到此為止，又要展開另一次尋底之旅。
麥狄文
(徐狄怡‧證監會持牌人)
