上周五美股無力反彈，雖然亞馬遜業績好過預期，納指升47點收市，但道指跟標指分別跌366點及19點。標指失守4300重要支持後全面轉弱，暫時跌至4000至4250區間上落，VIX回升至21水平，淡友未肯罷休。標指暫時跌咗入技術性回調區域，唔上返去4300上面，都係偏軟。聯儲局本周四香港時間凌晨議息，市場預期息率維持不變，鮑爺講話成焦點，繼續放鷹抑或由鷹轉鴿，將會直接影響市場走勢。至於港股喺今日期指結算日，表現反覆。
恒指低開173點，開市價17225正正係半日低位，其後跌幅收窄，一度倒升2點，見17401半日高位，但20日線(17482)未能成功收復，暫時剛好企喺10日線(17348)附近，無乜方向。恒指半日跌49點，報收17349；國指跌59點，半日報收5919；恒科指跑贏大市，半日升14點，報3820。半日成交額512億元，自從阿爺再放水後，中港兩地股市成交略增，市場流動性似有改善。
中資金融股今日表現麻麻，係今日跌市主要原因，郵儲行(01658)第三季少賺逾2%，股價跌7.1%；招行(03968)半日挫半成，建行(00939)跟工行(01398)半日分別跌2.6%及3.9%；內險股普遍亦跌1%以上。至於其他金融股，大笨象(00005)公布業績前靠穩，半日升0.4%，雖然第3季列帳基準稅前盈利77.14億美元，按年升1.38倍，但差過預期，派息10美仙則跟預期相同。集團擬進一步回購最多達30億美元股份，料於短期內展開，並於2024年2月21日公布2023年全年業績前完成。有回購好過無，料對股價有一定支持，但唔會有太大刺激。友邦(01299)半日則跌0.3%；港交所(00388)升0.5%，暫時無乜方向。
重磅科網股普遍做好，小米(01810)近日強勢，半日再升3.1%，創月內高位14.08元；ATMJB表現好壞參半，美團(03690)跟騰訊(00700)半日升0.1%及0.4%；京東(09618)無起跌；但阿里(09988)跟百度(09888)半日跌逾1%。
汽車股個別發展，長城汽車(02333)業績後有追捧，股價半日升6.1%；但電動車股普遍走軟，蔚來(09866)半日跌逾3%，理想(02015)、小鵬(09863)及零跑(09863)半日齊齊跌逾1%。不過生科股承接上周升勢，今日普遍再升，香港上市生物科技指數半日升4.8%。翰森(03692)半日升7.4%，為半日表現最好藍籌；藥明生物(02269)升5.8%，公司分拆上市的藥明合聯已通過上市聆訊。中生製藥(01177)升4.1%。
今日期指結算，個市跌唔落，睇嚟要等埋結算先見真章，上月結算價係17430，暫時結算價喺14300附近，同上個月結算價17430相當接近，好淡雙方喺10月份未分勝負，不過淡友早已喺8月及9月獲勝，好友會否反攻，10日及20日線變得相當關鍵。至於消息面方面，聯儲局預期唔加息，加上11月習拜會可能性極大，中美關係有望改善，A股喺阿爺力托下，已止跌，都有望為港股帶嚟支持，為好友反攻提供有利環境。
麥狄文
(徐狄怡‧證監會持牌人)
